Նորք-Մարաշում վնասազերծված խմբի ղեկավար Արթուր Վարդանյանն այսօր դատարանում հերթական նիստի ժամանակ տեղից խոսելով մեկնաբանեց վկա-լրագրողի նախաքննական ցուցմունքները: Նա ասաց, որ հակասություններ կան, ուստի ցուցմունքները կորզված են:
Նաեւ հարց բարձրացրեց՝ եթե վկա Լիլիթ Թորոսյանը չի իմացել իր, ինչպես Թորոսյանն է նշել, զինված հեղաշրջում անելու փորձերի մասին, ապա ինչպե՞ս է գաղտնի ձայնագրել այդ մասին իր եւ գործով մեկ այլ մեղադրյալ Վահան Շիրխանյանի հետ զրույցը:
Ապա Արթուր Վարդանյանն ասաց. «Հա, ես լրտեսների եմ ուղարկել Ադրբեջան, լավ եմ արել, բա ի՞նչ անեի, երկրին պատերազմն էր սպառնում»:
Այսօրվա նիստում Արթուր Վարդանյանը շարունակում էր գիրք ընթերցել եւ առանց դատավորի թույլտվության տեղից խոսում էր, ինչի համար նախազգուշացում ստացավ: Այնուհետեւ պատռեց իր առջեւ դրված ինչ որ թղթեր՝ դատավոր Արմեն Բեկթաշյանին ասելով. «Սա՜ է ձեր որոշումը»:
Լուիզա ՍՈՒՔԻԱՍՅԱՆ
