Համացանցում տեղեկություն է տարածվել, թե Պեկինի եւ Լոնդոնի օլիմպիական խաղերում դոպինգային կանոնները երեք եւ ավելի անգամ խախտելու համար 9 երկրի՝ Ռուսաստան, Ադրբեջան, Թուրիքիա, Ղազախստան, Չինաստան, Բելառուս, Ուկրաինա, Մոլդովա եւ Հայաստան, արգելվելու է մասնակցել նոյեմբերին Անահայմում մեկնարկող ծանրամարտի աշխարհի առաջնությանը:
Insidethegames.biz-ը գրում է, որ առաջարկվում է թվարկված երկրներին որակազրկել մինչեւ մեկ տարի ժամկետով, սակայն նրանց իրավունք է տրվելու այդ ժամկետները կրճատել աշխարհի առաջնությունից հետո:
Հայաստանի ծանրամարտի ֆեդերացիայի գլխավոր քարտուղար եւ ազգային հավաքականի գլխավոր մարզիչ Փաշիկ Ալավերդյանի մեկնաբանությամբ. «Դա առայժմ միայն առաջարկ է, որը պետք է քննարկվի սեպտեմբերի 30-ից հոկտեմբերի 1-ը Բուխարեստում կայանալիք IWF գործադիր խորհրդի արտահերթ նիստում: Մենք ծանրամարտի միջազգային ֆեդերացիայից պաշտոնական գրություն չենք ստացել, սակայն IWF-ին համապատասխան նամակ ենք պատրաստում»:
Աշոտ ՀԱԿՈԲՅԱՆ
