Տարածքային կառավարման եւ զարգացման նախարարի առաջին տեղակալ Վաչե Տերտերյանն այսօր ԱԺ-ում ներկայացրեց «Քաղաքական ապաստանի մասին» ՀՀ օրենքում փոփոխություն եւ լրացում կատարելու մասին նախագիծը:
Նախագծով առաջարկվում է, որ ՀՀ-ից քաղաքական ապաստան խնդրողների հարցով զբաղվի ոչ թե ՀՀ նախագահը, այլ՝ կառավարության սահմանած լիազոր մարմինը:
«Ծառուկյան» դաշինքի պատգամավոր Նաիրա Զոհրաբյանը հարցրեց՝ ՀՀ-ից քաղաքական ապաստան խնդրող կա՞, քանի՞սն են խնդրել: Նա նաեւ հետաքրքրվեց, թե քանի՞ մարդ է ՀՀ-ից ԵՄ երկրներ տարեկան դիմում՝ քաղաքական ապաստան ստանալու համար: Վաչե Տերտերյանը պատասխանեց, որ քաղաքական ապաստան հայցող մարդիկ դեռ մեզ չեն դիմել, իսկ այլ երկրներին դիմող հայերի մասին Տերտերյանը տվյալներ չուներ:
Ավելի ուշ իր ելույթում Նաիրա Զոհրաբյանը հրապարակեց որոշ տվյալներ. «Ի տարբերություն Ադրբեջանի եւ Վրաստանի` մեր տարածաշրջանում Հայաստանն ամենամեծն է թվով, որտեղից քաղաքական ապաստանի համար դիմում են ԵՄ երկրներ: Դիմում են տարբեր կարգավիճակներ ստանալու՝ ամենաէկզոտիկ եւ ամենաայլանդակ պատճառներով: Վերջին շրջանում շատացել է իբր խառնամուսնությունների պատճառով քաղաքական ապաստանի համար դիմածների թիվը: Նախ պետք է ճշտվի, թե որ ծառայություններն են, որ անձնագրեր եւ տեղեկանքներ են տալիս մեր այն քաղաքացիներին, որոնք բրյուսելներում հանդես են գալիս իբրեւ «ալիհասանովներ»: Սա մեր ամոթն է: Հայաստանցիների 90 տոկոսը մերժում է ստանում՝ քաղաքական ապաստանով դիմածների: Տարեկան 10 հազար մարդ է դիմում եվրոպական երկրներ՝ տարբեր կարգավիճակ ստանալու: Մերժում ստանալուց հետո անգամ մարդիկ չեն վերադառնում Հայաստան»:
Հռիփսիմե ՋԵԲԵՋՅԱՆ
