Արթուր Պետրոսյան. «Սա ուղղակի խայտառակություն էր» (Տեսանյութ)

Լեհաստանից կրած խոշոր հաշվով պարտությունից հետո ֆուտբոլի Հայաստանի ազգային հավաքականի գլխավոր մարզիչ Արթուր Պետրոսյանը հետխաղային մամուլի ասուլիսում լրագրողներին հայտարարեց. «Սա ուղղակի խայտառակություն էր»:

Մարզիչը չի համարում, թե սխալ կազմ էր ընտրել: «Ավելի լավ կլիներ մարտավարական սխալներով պարտվեինք, քան մանկական սխալներ թույլ տայինք: Սա իմ մարզական կարիերայի ամենացավալի պարտությունն էր: Ավելի լավ է գետինը մտնեի, քան այստեղ գայի եւ խոսեի», – ասաց Արթուր Պետրոսյանը:

Խոսելով կիրակի օրը Ղազախստանի հետ արտագնա հանդիպմանը նախապատրաստվելու եւ տրամադրվելու մասին՝ մասնագետն ասաց. «Այլ միջոց չունենք, պարտավոր ենք վերականգնվել եւ Ղազախստանում խայտառակ չլինել: Վաղը նոր օր է սկսվում…»:

Հարցին՝ կարելի՞ է այս կազմի հետ հաջորդ ընտրական փուլի համար հույսեր կապել, Արթուր Պետրոսյանը պատասխանեց. «Ոչ։ Իմ կարծիքով մեր թիմին «թարմություն» է պետք: Նայում եմ մեր մինչև 21 տարեկանների հավաքականին, և, ինչպես գիտեք, այնտեղ հիմնականում խաղում են Առաջին խմբի ֆուտբոլիստներ: Միակ մեր ելքը տեսնում եմ դրսից նոր ֆուտբոլիստներ բերելն է: Այս կազմով բարդ կլինի պայքարել անգամ Ազգերի Լիգայում: Ունենք շատ տաղանդավոր և երիտասարդ ֆուտբոլիստներ, բայց աճ չի նկատվում նրանց մոտ: Միգուցե բավարարվում են, որ խաղում են Բարձրագույն խմբում կամ մինչև 21 տարեկանների հավաքականում: Կարծում եմ, որ ֆուտբոլիստն է իր աճի համար պատասխանատու: Նրանք պետք է լավ խաղան, աճ գրանցեն, նոր մենք նրանց հրավիրենք հավաքական»:

Աշոտ ՀԱԿՈԲՅԱՆ