Դատավոր Աննա Դանիբեկյանի նախագահությամբ այսօր լեզվաբան Փառանձեմ Մեյթիխանյանի ամուսնու՝ Եղիշե Խաչատրյանի սպանության գործով հերթական դատական նիստն էր: Հիշեցնենք, որ նրան 2016թ.-ին Նուբարաշենի խճուղում դիտավորությամբ հարվածներ հասցնելով կյանքից զրկելու համար մեղադրվում են երիտասարդներ Յուրի Հակոբյանը, Խաչիկ Կոսյանը, Արարատ Նիկողոսյանը, Արտաշես Չիչոյանը, Արթուր Զաքարյանը:
Այսօր որպես վկա հարցաքննվեց վիճաբանության վայրի մոտ գտնվող ավտոտեխսպասարկման կետի տնօրեն Հայկ Պետրոսյանը: Նա նախորդ նիստում եւս ցուցմունք էր տվել, սակայն նրա ասածներում հակասություններ կային, ուստի ամբաստանյալների պաշտպանները խնդրեցին հստակեցնել, թե ինչ է նա տեսել Եղիշե Խաչատրյանի եւ երիտասարդների վիճաբանության առնչությամբ:
Հայկ Պետրոսյանը նախ ասաց՝ ամբաստանյալները չեն հարվածել Եղիշե Խաչատրյանի մորը՝ գործով տուժող Էմմա Աբրահամյանին, մինչդեռ նախաքննության ժամանակ հակառակն էր ասել: Էմմա Աբրահամյանն էլ, հիշեցնենք, պնդել էր, իր իրեն եւս հարվածել են: Դատավարության կողմերը հետաքրքրվեցին, թե Պետրոսյանն իր տեխսպասարկման կետում կատարվածի վերաբերյալ ի՞նչ կարող է ասել: Հիշեցնենք, որ ըստ գործում առկա նյութերի՝ տաքսու վարորդ Սանասար Գաբրիելյանը ցանկացել է բաժանել վիճաբանողներին, մինչդեռ երիտասարդները հետապնդել են նրան՝ նրա հետեւից գալով մինչեւ ավտոսպասարկման կետ: Հայկ Պետրոսյանը հերքեց իր նախաքննական ցուցմունքն այն մասին, որ երիտասարդներից մի քանիսը հարձակվել են վարորդի վրա:
«Նրանք մոտեցան ավտոսպասարկման կետին: Տղաներից մեկն է միայն հարձակվել ու հայհոյել: Խաչիկ Կոսյանը չի եղել այդ անձը: Նա մինչեւ վարորդի գալը եղել է մեր մոտ: Մի մեքենա էր բերել սարքելու, վթարված էր, դրանով էինք զբաղված: Նա հարբած չէր, բայց չեմ էլ հիշում, թե հետո ում վրայից ալկոհոլի հոտ առա»,-պատմեց Հայկ Պետրոսյանը: Հիշեցնենք՝ նախաքննական ցուցմունքում Պետրոսյանը հայտնել էր, թե Կոսյանը վարորդի վրա հարձակվողներից է եղել:
Լուիզա ՍՈՒՔԻԱՍՅԱՆ
