ՀՀԿ խոսնակ Էդուարդ Շարմազանովը կուսակցության գործադիր մարմնի նիստից հետո լրագրողներին հայտնել էր, որ Հանրապետական խմբակցությունը չի խոչընդոտի կառավարության ծրագրի ընդունմանը:
Լրագրողները հետաքրքրվեցին, թե արդյոք կարելի է ենթադրել, որ կողմ քվեարկելով խմբակցությունը ընդունում է կառավարության ծրագրի՝ արտահերթ ընտրությունների վերաբերյալ կետը:
Էդուարդ Շարմազանովը պատասխանեց, որ քաղաքական համակարգում չկա այնպիսի հարց, որի վերաբերյալ Հանրապետական կուսակցությունը պատրաստ չէ երկխոսություն և քննարկումներ ծավալել. «Բայց արտահերթ ընտրությունները պատվերով համերգ չէ: Եվ քաղաքական ուժերը պետք է մոտենան արտահերթ ընտրություններին, ինչպես մեր գործընկերներն են ասում, բարեփոխված ընտրական օրենսգրքով: Որպեսզի մենք ունենանք ընտրական բարեփոխված օրենսգիրք, մենք պետք է ունենանք լայն կոնսենսուս, մենք պետք է ունենանք միջազգային փորձագիտական կազմակերպությունների այդ թվում նաև Վենետիկի հանձնաժողովի մասնագիտական դրական գնահատականը:
Մենք պետք է հասկանանք, որ այդ բարեփոխումները, որոնք մենք ներառում ենք Ընտրական օրենսգրքի մեջ և այդ ռեսուրսները՝ նաև ֆինանսական, որտեղից են, մենք պետք է հասկանանք, թե ինչքան ժամանակահատվածում մենք կարող ենք դա անել: Ես և՛ արհեստական ձգմանն եմ դեմ, և՛ շտապ փոփոխություններին: Եթե մենք՝ բոլոր քաղաքական ուժերը, և քաղաքացիական հասարակությունը գտնում ենք, որ Ընտրական օրենսգիրքը բարեփոխման ենթակա է, մենք պետք է նստենք և շատ լուրջ մասնագիտական քննարկում ծավալենք»:
Ամի ՉԻՉԱԿՅԱՆ
