Ազգային ժողովը 2-րդ ընթերցմամբ ընդունեց ընտրակաշառքի դեպքերի պատիժը խստացնող օրենսդրական փոփոխությունները: Այս փոփոխություններում է ներառված նաեւ բարեգործությունը: Փոփոխությունների հեղինակները վստահեցնում են. «Եթե նախկինում ընտրությունների ընթացքում թեկնածուների ու կուսակցությունների անունից իրականացվող բարեգործության արգելքի խախտումը վարչական իրավախախտում էր, եւ գործնականում հնարավոր չէր այն բացահայտել, ապա այժմ, հաշվի առնելով դրա հանրային վտանգավորությունը, այդ արարքը քրեականացվել է: Դա նոր հնարավորություն է գումար, գույք, ծառայություն նվիրելու արատավոր երեւույթների դեմ պայքարի համար, հնարավորություն պայքարելու ոչ թե փողի, այլ ծրագրերի դաշտում»:
Օրենսդրական փոփոխությամբ արգելվում է ընտրությունների կամ հանրաքվեի օրվանից մինչեւ ընտրությունների կամ հանրաքվեի արդյունքների ամփոփումը բարեգործության անվան տակ ընտրողներին, հանրաքվեի մասնակիցներին անհատույց կամ արտոնյալ պայմաններով դրամ, սննդամթերք, արժեթղթեր, ապրանքներ տալը կամ բարեգործության հետ միաժամանակ նախընտրական կամ հանրաքվեի քարոզչություն իրականացնելը: Պատիժը խիստ է՝ նվազագույն աշխատավարձի երկուհազարապատիկից չորսհազարապատիկի չափով կամ ազատազրկում` 2-ից 6 տարի ժամկետով: Կան բարեգործներ, որոնք քաղաքացիներին անվճար երթեւեկություն (եւ ոչ միայն երթեւեկություն) են ապահովում արդեն քանի տարի: Հիմա եթե այս անձինք «ուտող-ուրացող» չեն, ենթադրվում է՝ բարեգործությունը «հետադարձ ուժ» կունենա, թեկուզեւ այն չիրականացվի ընտրությունների օրը:
Լուսանկարը՝ ՆԵԼԼԻ ԲԱԲԱՅԱՆԻ
«Առավոտ»
08.09.2018
