«Դիրքապահ» քառօրյա պատերազմի մասնակիցների միավորում ՀԿ ղեկավար Մանուել Մանուկյանը, անդամներ Դավիթ Օհանջանյանը եւ Սարգիս Սարգսյանն այսօր «Տեսակետ» մամուլի ակումբում իրենց բողոքն էին ներկայացնում Մանվել Գրիգորյանի խափանման միջոցը գրավի դիմաց փոխելու մասով: «Մտահոգիչ է, որ զինվորի բաժինը գողացողն այսօր կարող է լինել ազատության մեջ»,- ասաց Մանուել Մանուկյանը: Նաեւ Մանվել Գրիգորյանի խափանման միջոցի փոփոխությունն իրենց վիրավորել է, քանի որ տեսանյութում լրագրողի հացին ի պատասխան, Մանվել Գրիգորյանն ասում է, որ շատ լավ է զգում իրեն, մինչդեռ նրա խափանման միջոցը փոխելու հիմնական պատճառներից մեկն էլ առողջական խնդիրն է բերվում:
«Էլի կան մարդիկ, ովքեր գողացել են, տեսնելով այս ամենը, իրենց շատ հանգիստ ու ապահով կզգան, մինչդեռ երբեւէ զինվորի բաժինը գողացած անձինք պետք է պատասխանատվության ենթարկվեն»,- շարունակեց Մանուել Մանուկյանը`հավելելով`եթե ամենը մի կողմ դնենք`այն նամակները, որոնք զինվորին էին գրված, այդ օրերին դիրք չհասան… Իսկ բարոյահոգեբանական մթնոլորտը ինքը շատ է կարեւորում:
Կազմակերպության ղեկավարն ու անդամները սպառնում են դուրս գալ փողոց, պայքարն օրինականության համար շարունակել, քանի որ այդ պայքարն իրենք ասում են՝ սկսել են դեռ ապրիլյան պատերազմից հետո: «Դատավորն ո՞ւմ նշանակածն է եղել, ինչքանո՞վ է պատասխանատու, ինչքանո՞վ` ոչ, թող պատկան մարմինները զբաղվեն, բայց երկրով մտահոգ բոլոր հայերի նկատմամբ սա անբարոյական վերաբերմունք է: Մի ստիպենք, որ մենք նույնպես դուրս գանք փողոց: Մենք վստահել ենք այս կառավարությանն ու իշխանությանը, ինչի արդյունքում իրենք մանդատ են ստացել: Այդ վստահության համար է, որ դուրս չենք գալիս փողոց, բայց իրենք չպետք է մեզ հիասթափեցնեն»,- շարունակեց Մանուել Մանուկյանը:
Լրագրողներից մեկը նկատեց`իրավական գործընթաց է գնում, Մանվել Գրիգորյանին չեն արդարացրել, ձեր կողմից վստահության արժանացած կառավարությունն էլ այդ վստահությունն է փորձում իրացնել, յուրաքանչյուր մարդ ունի իրավունք, որը պետք է իրացվի. նման հայտարարությունները ձեր կողմից արդյո՞ք ճնշում չեն: Երիտասարդները մնացին անդրդվելի`սա իրենց տեսակետն ու պահանջն է: «Շատ է կարեւորվում այսօր ժողովրդի խոսքը, ոչ թե օրենքի առումով, այլ որպես հասարակության պահանջ: Իմ մոտ իր մեղքը հիմնավորվել է ԱԱԾ-ի տեսագրություններով, հիմնավորվել է, որ ներկայացվել են այդպիսի փաստեր: Մնացածը`ինձ չի հետաքրքրում»,-ասաց Մանուել Մանուկյանը:
Հարցին`եթե հանկարծ, ասենք, մեկ տարի անց պարզվի, որ այն մեղքերը , որոնք վերագրվում են Մանվել Գրիգորյանին, իրականությանը չեն համապատասխանում, նա լավ էլ արդար է, հերոս է, ի՞նչ կանեն իրենք, երիտասարդները հստակ պատասխան չտվեցին: Վերջում ասացին. «Կփաստենք, որ սխալ տեղեկատվություն է տրամադրվել մեզ»:
Նելլի ԳՐԻԳՈՐՅԱՆ
