ՀՅԴ Հայաստանի Երիտասարդական միության «Ահազանգ» նախաձեռնության անդամներն, ինչպես որ պահանջում էին, հանդիպեցին ԱԺ «Իմ քայլը» խմբակցության ղեկավար Լիլիթ Մակունցի հետ:
Նախաձեռնության անդամները բողոքի ցույց էին անում ընդդեմ եկամտային հարկի համահարթեցման եւ կոչ են անում Հարկային օրենսգրքի այդ փոփոխությանը դեմ քվեարկել:
Մինչ Մակունցի հետ հանդիպումը նրանց հետ հանդիպեցին ԱԺ «Իմ քայլ»-ը խմբակցության պատգամավորներ եւ Տնտեսական հարցերի մշտական հանձնաժողովի նախագահ Բաբկեն Թունյանն ու հանձնաժողովի անդամ Հայկ Գեւորգյանը:
Նրանք ցուցարարներին փորձում էին համոզել, որ եկամտային հարկի համահարթ տարբերակը բնավ նրանց նշած՝ աղքատներն է՛լ ավելի կաղքատանան, հարուստներն էլ՝ կհարստանան միտումը չունի, սակայն ապարդյուն: Նախաձեռնության անդամներն իրենց համոզմունքն էին պնդում:
Կարդացեք նաև
Բաբկեն Թունյանն ի վերջո առաջարկեց բովանդակային քննարկում կազմակերպել ԱԺ-ում:
Ապա Լիլիթ Մակունցի հետ հանդիպմանը ցուցարարներն ասացին. «Մենք նամակ ենք փոխանցել կառավարությանը, եւ ուզում ենք ասել պատգամավորներին՝ եթե նախագիծն օրենքի ուժ ստանա, իրենք անձամբ պատասխանատու են լինելու մարդկանց կյանքի որակի վատթարացման համար, եւ մենք շատ ենք ուզում, որ հանկարծ չկտրվեք իրականությունից»:
Մակունցը վստահեցրեց. «Այն, որ ես այստեղ եմ եւ այն, որ առանձին պատգամավորներ գալիս են ու շփվում են, դա վկայությունն է, որ չենք կարող եւ ցանկությունն էլ չունենք կտրվել իրականությունից»: Հետո Մակունցը հիշեցրեց ցուցարարներին՝ եկամտային հարկի համահարթեցման մասին թե՛ նախընտրական շրջանում, եւ թե՛ դրանից հետո հանրային քննարկումներ եղել են:
«Հայաստանի հանրապետությունում քաղաքացիները բազմաշերտ են եւ տարբեր սոցիալական շերտեր են ներկայացնում: Նրանք մեզ ընտրել են, որպեսզի իրենց կարիքներն ու շահերը ներկայացնենք»,-ասաց Մակունցն ու պայմանավորվածությունը հանգեց նրան, որ նախագծի շահագրգիռ կողմերով ԱԺ-ում կքննարկեն այն:
Ցուցարարները Մակունցին զգուշացրեցին՝ ԱԺ շենքի դիմաց հնամաշ հագուստ են թողնելու՝ որպես հիշեցում եւ խորհրդանիշ աղքատների ու սոցիալապես վատ ապրողների:
Մանրամասն՝ տեսանյութում
Նելլի ԲԱԲԱՅԱՆ
