«Կառավարությունը հետապնդում է ծախսերի նվազեցման քաղաքականություն. վարչապետ Նիկոլ Փաշինյանի աշխատակազմում, օրինակ, օբյեկտիվ պատճառներով ավելացել են գործուղումների ծախսերը»,-«Մեդիա կենտրոնում» լրագրողների հետ հանդիպմանն այսօր հայտարարեց «Հանրային քաղաքականության հետազոտությունների ազգային կենտրոն» հ/կ-ի գործադիր տնօրեն Արմենուհի Բուռնազյանը:
«Ավիատոմսերի գնման համար միայն հեղափոխությունից հետո 33 միլիոն դրամի ծախս է կատարվել: Սակայն սա կարելի է բացատրել, որովհետեւ վարչապետի գործառույթներն այժմ ավելի լայն են, գործուղումների թվի ավելացումը հասկանալի է: Մյուս կողմից, հանրությունը պետք է տեղյակ լինի, թե ինչ ուղղություններով են դրանք կատարվել, արդյունավետ են եղել, թե ոչ: Մենք անարդյունավետության մի քանի դեպք են հայտնաբերել, օրինակ, նախագահի աշխատակազմում: Նախորդ տարվա օգոստոսին Երեւան-Թեհրան ավիատոմսը գնվել է շուկայական գնից ավելի թանկ»,-հայտնեց փորձագետը:
Նրա փոխանցմամբ՝ նախագահի աշխատակազմում ծախսերն ընդհանուր առմամբ եւս նվազել են, սակայն ավելացել են ներկայացուցչական ծախսերը: Հիշեցնենք, որ «Գնումների մասին» օրենքով՝ ՀՀ նախագահի, վարչապետի եւ ԱԺ նախագահի արարողակարգային ծախսերը գաղտնի են:
Կարդացեք նաև
Լուիզա ՍՈՒՔԻԱՍՅԱՆ
