«Ե՞րբ եւ ո՞ւմ համար ստեղծվեց Բարձրագույն դատական խորհուրդը: Հուսամ՝ որեւէ մեկը չի մոռացել, որ այն ստեղծվեց Սերժ Սարգսյանի կողմից՝ մեկ մարդու համար՝ ողջ կյանքում բոլոր տեսակի իշխանությունների համար ներուժ նվիրաբերած Գագիկ Հարությունյանի համար՝ նրան անգործ չթողնելու նպատակով: Արդարադատությունը բռնաբարողներին հրաժեշտ տալու ճանապարհին մեզ բարի ընթացք եմ մաղթում: Հաստատուն մնանք այս ճանապարհին»,-ԱԺ ամբիոնից այսօր հայտարարեց «Լուսավոր Հայաստան» խմբակցության պատգամավոր Արման Բաբաջանյանը:
Նրա խոսքով՝ ներկայումս Բարձրագույն դատական խորհրդի կազմավորման կարգն արդեն հակասում է «վեթինգ» իրականացնելու գաղափարին. «Պետք է խուսափել իրավիճակից, երբ ԲԴԽ անդամները համարվում են մտերիմ՝ գործող իշխանության հետ: Վեթինգի համատեքստում պետք է բացառվի քաղաքական միջամտությունը: ԲԴԽ-ն, սակայն, հանձինս պարոն Բեքմեզյանի, կարող է ասոցացվել իշխանության հետ: Պարոն Բեքմեզյանը հարցազրույցներից մեկում խոստովանեց, որ իրեն զանգել են «Իմ քայլից» եւ առաջարկել դառնալ ԲԴԽ անդամ»:
Հիշեցնենք, որ ԱԺ-ն այսօր քննարկում էր իրավաբան Գրիգոր Բեքմեզյանի թեկնածության հարցը: Նրան ԲԴԽ անդամի պաշտոնում առաջադրել է «Իմ քայլը» խմբակցությունը:
Լուիզա ՍՈՒՔԻԱՍՅԱՆ
