Այսօր ԱԺ արտահերթ նիստում «Իմ քայլը» խմբակցության պատգամավոր Արմեն Խաչատրյանը Ագարակի պղնձամոլիբդենային գործարանի խնդրի հետ կապված հայտարարություն արեց. «Արդեն քանի օր է՝ Սյունիքի մարզում խմորումներ են գնում՝ կապված Ագարակի պղնձամոլիբդենայինի հետ: Այս պահի դրությամբ այնտեղ գործադուլ է, ունենք հազարից ավելի աշխատակից: Ագարակի եւ Մեղրու բնակիչները, որոնք հիմնական մասն են կազմում աշխատավորության, գտնում են, որ կոպտորեն խախտվել են իրենց աշխատանքային իրավունքները, սոցիալական ապահովության մի շարք խնդիրներ են առաջ բերվում»:
Խաչատրյանն առաջարկեց կառավարությանը հրատապ միջոցներ ձեռնարկել. «Ուշադրության կենտրոնում պետք է պահել խնդիրը: Ես վաղը մեկնելու եմ Մեղրի, եթե հնարավոր է, իրավասու պաշտոնատար անձինք միանան ինձ եւ փորձենք լուծել այդ խնդիրը: Այս պահի դրությամբ գործադուլ է եւ անորոշ: Բնակիչները՝ աշխատակիցները չգիտեն, թե որքանով են խախտվել իրենց իրավունքները, պահանջում են, որ վճարեն իրենց՝ տարիներ առաջ արտաժամյա աշխատանքի դիմաց, որոնք իրենք կատարել են եւ որեւէ մասնագիտական վերլուծություն, աջակցություն այս պահի դրությամբ չկա: Չհաշված, որ Մեղրիի քաղաքապետը մարզպետի հետ միասին ջանքեր են գործադրում, բայց այստեղ գտնում եմ, որ անելիք ունի աշխատանքի տեսչությունը եւ կառավարության համապատասխան օղակները: Ես վաղը մեկնելու եմ Մեղրի, եթե ցանկացողներ կան ԱԺ-ից, նաեւ հորդորում եմ, որ կառավարությունից համապատասխան պաշտոնատար անձինք իմ հետ գան»:
Հռիփսիմե ՋԵԲԵՋՅԱՆ
