ՀՀ ԱԺ լիագումար նիստի ընթացքում «Իմ քայլը» խմբակցության պատգամավոր Արտակ Մանուկյանը ներկայացրեց իր հեղինակած «ՀՀ Ազգային ժողովի աշխատակազմում պետական ծառայության մասին» օրենքում փոփոխություն կատարելու մասին» նախագիծը: Ըստ նախագծի՝ ԱԺ-ի պետական ծառայողները կունենան ամենամյա նվազագույն և ամենամյա լրացուցիչ արձակուրդի իրավունք։
Այս առիթով Արտակ Մանուկյանը մանրամասնեց. «Այս նախագիծը, որն առաջարկում ենք, պայմանավորված է ՀՀ ԱԺ-ում պետական ծառայողների մասով որոշակի խտրականության դրսևորմամբ: Ինքս և ԱԺ աշխատակազմը համանման բնույթի բազում բողոքներ ենք ստացել, ինչով էլ պայմանավորված է այս նախագծի իրականացումը: Խոսքը չորսօրյա հավելյալ արձակուրդի մասին է: Նախկինում հավելյալ չորսօրյա արձակուրդ այդ անձինք չեն ստացել. հիմա առաջարկում ենք այս դրույթը կիրառել: Մենք օր առաջ ուզում ենք այդ անարդարությունը վերացնել, քանի որ գտնում ենք՝ այդտեղ իրավականորեն որոշակի խնդիր կա»:
ՀՀ ԱԺ «Իմ քայլը» խմբակցության պատգամավոր Լուսինե Բադալյանն էլ պարզաբանեց. «ԱԺ աշխատակազմի պետական ծառայողները համարվելու են քաղծառայողներ և օգտվելու են Քաղծառայության մասին օրենքով նախատեսված դրույթներից և երաշխիքներից, այդ թվում տվյալ օրենքով սահմանված լրացուցիչ արձակուրդից»:
Տաթև ՀԱՐՈՒԹՅՈՒՆՅԱՆ
Հարգելիներ, անարդարությունը ոչ թե վերականգնում են, այլ՝ վերացնում․․․