Կառավարության շենքի առաջ այս պահին բողոքի ցույց են անում արցախյան պատերազմում զոհվածների ծնողները: Նրանք պահանջում են իրենց նույնպես աջակցել:
Արդեն կես ժամ է՝ կառավարության կենտրոնական մուտքի դռները փակ են: Զոհված զինվորի մայր Մարգարիտա Խաչատրյանը (որը հայտնի է «Մառոզ» անունով) նստել է մուտքի առաջ եւ արցախյան պատերազմում եւ խաղաղ պայմաններում զոհված զինվորների, ազատամարտիկների մյուս ծնողների հետ բողոքի ցույց է անում:
Նրանց վրդովվեցրել է, որ մարտի 1-ի զոհերի հարազատներին կառավարությունը 30 մլն դրամ գումար է փոխհատուցում, իսկ իրենց այսքան տարիների ընթացքում ոչ մի նման աջակցություն չի եղել:
Կարդացեք նաև
Զոհվածների մայրերը խոստանում են չհեռանալ այնքան ժամանակ, մինչեւ կառավարությունը կամ կառավարության ղեկավարը՝ Փաշինյանը, իրենց պահանջին լուծում չտա:
Մարգարիտա Խաչատրյանի խոսքով՝ բանակում տեղի ունեցած որեւէ հանցագործություն չի բացահայտվում, սպանությունները ինքնասպանություններ են ներկայացվում: «Ամեն մեկի գործով առանձին դիմում ենք գրել, բայց ոչ մի արձագանք: Այսքան ժամանակ լռում էինք, բայց կառավարության այս քայլից հետո այլեւս չենք պատրաստվում հանդուրժել մեր նկատմամբ նման վերաբերմունքը: Եթե ուզում են նստենք ասֆալտին՝ կնստենք: Եթե նրանք չեն ամաչում, որ զոհված զինվորի մայրն այսօր ասֆալտին նստած է, ուրեմն նրանց պատիվն է»:
Լուսինե ԲՈՒԴԱՂՅԱՆ
