Մոսկվայի Տվերի դատարանը մասնակի բավարարել է «Արմենիա» ռեստորանի` 550 հազար ռուբլի գումարի չափով փոխհատուցման մասին հայցը: Դատարանը վճռել է, որ «Արմենիա» խանութ-սրճարանը ռուս ընդդիմադիր գործիչներից փոխհատուցում կստանա 241 հազար 520 ռուբլու չափով՝ հուլիսի վերջին Մոսկվայի կենտրոնում բողոքի ցույցերի կազմակերպիչներից կրած վնասի համար:
Որպես պատասխանող կողմ հանդես են գալիս ընդդիմադիր քաղաքական գործիչ Ալեքսեյ Նավալնին, Մոսկվայի քաղաքային դումայի չգրանցված թեկնածուներ Իլյա Յաշինը և Լյուբով Սոբոլը, ինչպես նաև Կոռուպցիայի դեմ պայքարի հիմնադրամի աշխատակից Գեորգի Ալբուրովը:
Ավելի վաղ ռեստորանի սեփականատեր «Անկոր» ընկերությունը դատական հայց էր ներկայացրել ընդդիմադիր քաղաքական գործիչների դեմ՝ պահանջելով 550 հազար ռուբլու փոխհատուցում, քանի որ հուլիսի 27-ի բողոքի ցույցը տեղի էր ունեցել ռեստորանի անմիջական հարևանությամբ, ինչի պատճառով հաստատությունը ստիպված են եղել փակել այդ օրը:
Պատրաստեց՝ Վիկտորյա ԱՆԴՐԵԱՍՅԱՆԸ
