Վազգեն Սարգսյան փողոցում գտնվող նախարարությունների շենքերի կենտրոնական մուտքի դիմաց այսօր բողոքի ցույց արեցին նաեւ ՀՀԿ երիտասարդական կառույցի ներկայացուցիչները։ Նրանք էլ դժգոհ են ԱԳ նախարար Զոհրաբ Մնացականյանից եւ կարծում են, որ նա էլ պետք է հեռանա։
Հիշեցնենք, որ նույն վայրում նաեւ ՀՅԴ երիտասարդներն են եւ ԵՊՀ բանասիրական ֆակուլտետի այն ուսանողները, որոնք պահանջում են ԿԳՄՍ նախարար Արայիկ Հարությունյանի հրաժարականը։
ՀՀԿ երիտասարդական կազմակերպության ղեկավար Հայկ Մամիջանյանը լրագրողներին ասաց, որ ՀՀ նոր իշխանությունների արտաքին քաղաքականությունը եւ խոստումները դատարկ են։
ՀՀԿ երիտասարդները ԱԳ նախարարի համար որպես խորհրդանշական նվեր բերել էին դատարկ ճամպրուկ` որպես բնորոշիչ, իրենց խոսքով, այդ դատարկ քաղաքականության։
Կարդացեք նաև
Հայկ Մամիջանյանը քննադատեց նաեւ ԱԳՆ քաղաքականությունն Արցախի հարցում` նամակի տեսքով նախարարից պահանջելով պատասխանել, թե ինչու են օրակարգից դուրս մղվել Վիեննայի եւ Սանկտ-Պետերբուրգի պայմանավորվածությունները, եւ թե երբ է Արցախը վերադառնալու բանակցային սեղանի շուրջ։
Լուիզա ՍՈՒՔԻԱՍՅԱՆ
