Վերջին տարիներին շատ հայտնի դարձած «Բենեդիկտ» ձուն, կամ, թերեւս, ավելի ճիշտ կլինի ասել՝ թերխաշ ձվի մատուցման եղանակը, որը կոչվում է «Բենեդիկտ», ունի չորս գլխավոր բաղադրիչ՝ անգլիական մաֆին, տապակած բեկոն, ձու «պաշոտ» եւ «հոլանդեզ» թանձրուկ: Ըստ էության, բավականին հագեցնող եւ խիտ նախաճաշ է: Այսօր առաջարկում եմ մեկ այլ «Բենեդիկտ», որում ամերիկյան մաֆինի փոխարեն վրան սերուցքային պանիր քսած սեւ հաց է, իսկ տապակած բեկոնի փոխարեն՝ ավոկադո: Շատ համեղ նախաճաշ է՝ վստահեցնում եմ: Կարող են ուտել նաեւ բուսակերները, ովքեր չեն հրաժարվել ձվից եւ կաթնամթերքից:
Անհրաժեշտ մթերքները
Ձու- 4 հատ (2-ը՝ «հոլանդեզ» թանձրուկի, 2-ը՝ «պաշոտի» համար)
Քացախ-1 թեյի գդալ
Կարդացեք նաև
Սեւ հաց-2 կտոր
Սերուցքային պանիր-50 գրամ
Կարագ-100 գրամ
Կիտրոնի հյութ-1 ճաշի գդալ
Կանաչ սոխ-1 ճյուղ (պարտադիր չէ)
Ավոկադո- 0,5 հատ
Սեւ պղպեղ եւ աղ-ըստ ճաշակի
Պատրաստման եղանակը
Նախ պատրաստենք ձուն՝ ֆրանսիական ձեւով՝ «պաշոտ» եղանակով: Այս անվանումը հայերենում հայտնվել է ռուսերենից, որն էլ, իր հերթին, առանց թարգմանելու, վերցրել է ֆրանսերենից՝ poché բառից: «Պաշոտ» եղանակով պատրաստելու համար ձուն պետք է խաշել առանց կեղեւի: Որպեսզի լավ ստացվի, կան մի քանի նրբություններ, որոնք կփորձեմ մանրամասնել:
Փոքր կաթսայով ջուրը դրեք եռալու միջին կրակի վրա, հենց թեթեւ պղպջակներ հայտնվեն, լցրեք քացախը եւ ջուրը գդալով արագ արագ խառնեք մի ուղղությամբ, որպեսզի ջրի մեջ ձագարաձեւ խոռոչ հայտնվի:
Ձուն կոտրեք եւ միջինն արագ լցրեք այդ ձագարաձեւ խոռոչը ու գդալով սկսեք փախնող սպիտակուցն անընդհատ բերել դեղնուցի վրա՝ բոլոր կողմերից: Բնականաբար, անհնար է խուսափել սպիտակուցի որոշ կորուստից, սակայն որքան վարպետանաք, այնքան քիչ կլինի այն: Երբ սպիտակուցը արդեն պնդանա՝ դեղնուցի շուրջը, անցքերով գդալով հանեք ձուն ջրից եւ դրեք թղթե անձեռոցիկի վրա, որ ավելորդ հեղուկը դուրս գա:
Այժմ ժամանակն է պատրաստելու «Հոլանդեզ» թանձրուկը, որի պատրաստման մանրամասները ներկայացված են այստեղ: Դրա համար պետք է պատրաստել «ջրային բաղնիք», այսինքն՝ ջրով լի կաթսան դնել կրակին, իսկ կաթսայի վրա դնել հրակայուն որեւէ խորը աման՝ ցանկալի է ապակուց: Ուշադիր եղեք, որ այդ ամանի հատակը չկպնի եռացող ջրին: Ամանի մեջ լցրեք թանձրուկի համար նախատեսված մթերքները՝ 2 ձվի դեղնուցը, 100 գրամ հալած կարագը եւ արագ-արագ խառնեք, մինչեւ դառնա էմուլսայատիպ զանգված, որից հետո ավելացրեք կիտրոնի հյութը, մի պտղունց աղ եւ սեւ պղպեղ: Վերցրեք կրակից:
Այժմ հավաքենք մեր «Մեկ այլ «Բենեդիկտը»: Սեւ հացի վրա քսեք սերուցքային պանիր: Վրան շարեք բարակ կտրված ավոկադոյի շերտեր: Ավոկադոյի վրա պառկացրեք «պաշոտը», վրայից լցրեք «Հոլանդեզը»: Սեւ պղպեղը, ծովի աղն ու կանաչ սոխի մանրած կտորներն էլ՝ որպես զարդարանք:
Բարի ախորժակ:
Պատրաստեց Մելանյա ԲԱՐՍԵՂՅԱՆԸ
