«Ինքս ՄԻԱՎ-ով ապրող մարդ հանդիսանալով՝ ուզում եմ հարց ուղղեմ ձեզ՝ արդյոք մեր հասարակությունը բավականաչափ իրազեկվա՞ծ է, որպեսզի մենք մի տեղում օգտվենք այն ամեն ինչից, ինչից մյուսները: Մենք բոլորս էլ գիտենք Հայաստանում մեր հանդեպ խտրական վերաբերմունքի բարձր աստիճանը ե՛ւ հիվանդանոցներում, ե՛ւ հասարակության մեջ»,- այսօր ԱԺ առողջապահության եւ սոցիալական հարցերի հանձնաժողովում ՁԻԱՀ-ի կանխարգելման կենտրոնի՝ «Նորք» ինֆեկցիոն կենտրոնի հետ միավորման թեմայով աշխատանքային քննարկմանն ասաց «Դրական մարդկանց հայկական ցանցի» ներկայացուցիչ Արման Ավչյանը:
Առողջապահության նախարարության գլխավոր քարտուղարի պարտականությունները կատարող Լուսինե Քոչարյանը պատասխանեց. «Դուք շատ լավ գիտեք՝ ինչքան դժվար է հիվանդանոցներում՝ խարանի եւ խտրականության պատճառով՝ հենց նրա համար, որ դուք սովոր եք գնալ-գալ մեկ տեղ: Այսպես թե այնպես, ՄԻԱՎ-ով ապրող մարդն առանց որեւէ խտրականության պիտի ստանա բուժում: Այդ դեպքում ինչի՞ համար է անունը դրվում ՁԻԱՀ-ի կանխարգելման հանրապետական կենտրոն ու իրենց առանձնացնենք: Արման ջան, ինչի՞ց եք դուք տուժելու»: Ավչյանը պատասխանեց, որ չգիտեն ինչից են տուժելու, բայց կա տեղեկատվության պակաս. «Ես, որպես ՄԻԱՎ-ով ապրող մարդ, մտահոգված եմ, որովհետեւ ինֆորմացված չեմ»:
Կարդացեք նաև
Քննարկմանը ներկա էին կենտրոնի այն աշխատակիցները, որոնք աշխատանքից ազատման դիմում են ներկայացրել:
«Չգիտես ինչու, հանրային էմոցիոնալ ֆոն տրվեց ամբողջ գործընթացին: Որո՞նք են ՁԻԱՀ կենտրոնի մտահոգությունները, որ միավորման արդյունքում ծառայությունների որակը կվատանա»,- ասաց «Իմ քայլը» խմբակցության պատգամավոր, հանձնաժողովի փոխնախագահ Հերիքնազ Տիգրանյանը:
Ըստ նրա, կենտրոնի աշխատակիցները էմոցիոնալ ֆոնի վրա աշխատանքից ազատվելու դիմում են ներկայացրել, ուստի հորդորեց. «Դուք ունեք երեք օր ժամանակ հետ վերցնելու դիմումները: Այսօր լրանում է 3-րդ օրը»:
Հռիփսիմե ՋԵԲԵՋՅԱՆ
