Էջմածնի քաղաքացին, որի մոտ հայտնաբերվել է կորոնովիրուս, մեկուսացված է եւ այս պահին գտնվում է Նորք ինֆեկցիոն հիվանդանոցում: Նրա ինքնազգացողությունը նորմալ է, ծանր չէ, պարզապես բժիշկների հսկողության տակ է: Այսօր այս մասին ասաց Էջմիածնի քաղաքապետ Դիանա Գասպարյանը՝ ֆեյսբուքյան իր էջի ուղիղ եթերում: Մյուս քաղաքացիները, որոնք սերտ շփումներ են ունեցել այդ քաղաքացու հետ, եւ պոտենցիալ վարակակիր են, մեկուսացված են: Թե որտեղ են նրանք այս պահին գտնվում, քաղաքապետն ասաց, որ չի կարող վայրը նշել: Դիանա Գասպարյանի խոսքով, իրականությանը չեն համապատասխանում այն լուրերը, թե էջմիածնում 3 վարակակիր կա, որոնց ինքնազգացողությունը հարսանիքի ժամանակ վատացել է:
Խոսում եմ կորոնավիրուսի դեպքի մասին
Կարդացեք նաև
Gepostet von Diana Gasparyan/Դիանա Գասպարյան am Donnerstag, 12. März 2020
«Այն ինչ կատարվում է համացանցում, այն ինչ խոսվում է փողոցում՝ իրականությանը չի համապատասխանում, այդտեղ գույները թեժացված են եւ ճիշտ տեղեկատվությունը չի հասնում մարդկանց, կարծիքներ են, որոնք ճշտված չեն եւ անհարկի խուճապ են առաջացնում»,-ասաց քաղաքապետը՝ նշելով, որ վարակակիր քաղաքացին անցած կիրակի օրը մասնակցել է նշանդրեքի. «Երեկ երեկոյան այդ անձանց շրջանակը հստակեցվել է եւ փոխանցվել է Առողջապահության նախարարություն, նախարարությունը զտել է այն անձանց, որոնք սերտ շփում են ունեցել եւ կարող են պոտենցիալ վտանգ ներկայացնել եւ տվյալ անձանց մեկուսացրել են, որպեսզի թեսթավորեն՝ տեսնելու նախանշաններ կա՞ն, թե՞ ոչ»:
Դիանա Գասպարյանը նաեւ անդրադարձավ քաղաքում ոստիկանության եւ շտապօգնության մեքենաներին, որոնց առկայությունը մարդկանց մոտ խուճապ է առաջացրել. «Դրանք չեն ժամանել վատացած քաղաքացիներին տեղափոխելու կամ որեւէ մեկի վատանալու պատճառով: Նրանք աշխատում են վարակակիր քաղաքացու եւ նրա ունեցած սերտ շփումը պարզելու եւ տվյալ անձանց մեկուսացնելու նպատակով»:
Քաղաքապետը հորդորեց վստահել իշխանություներին. «Որովհետեւ, այս հարցերով զբաղվում են պրոֆեսիոնալները, ոլորտն ուսումնասիրած մարդիկ, ոլորտի մասնագետները, եւ եթե որոշվել է այս պահին մեկուսացնել այս քանակի մարդկանց, ուրեմն այդպես է նպատակահարմար գտել Առողջապահության նախարարությունը»:
Էջմիածինցիների այն մտահոգությունների առնչությամբ, թե պետք է դպրոցներում դասերը դադարեցնել, քաղաքապետն ասաց, որ դրանք չեն ենթարկվում քաղաքապետարանին եւ մարզպետարանի ենթակայության տակ են, իսկ ավագ դպրոցները՝ ԿԳՄՍ նախարարության:
Էջմիածնում համայնքապատկան կրթօջախներից այս պահին կփակվեն միայն սպորտդպրոցները: Ըստ Դիանա Գասպարյանի. «Մարզիկներն, ամեն դեպքում, ֆիզիկական կոնտակտ միմյանց հետ շատ են ունենում եւ տվյալ դեպքում դժվար կլինի ստերիլությունն ու ախտահանման գործընթացը պատշաճ կազմակերպել»:
Սպորտդպրոցները կփակվեն մեկ շաբաթով: Նրա խոսքով, այսօր վաղ առավոտից Էջմիածնի բոլոր մանկապարտեզներն ապահովվել են անհրաժեշտ քանակությամբ ախտահանիչ նյութերով. երեխաների ձեռքերն ախտահանվում են, տարածքը՝ նույնպես: Ասաց, որ հիգիենայի հետ կապված աշխատանքները իր հսկողության տակ են եւ այս պահին մանկապարտեզները փակելուն հակված չեն, քանի որ կան ծնողներ, որոնք աշխատում են եւ երեխաներին խնամող չունեն:
Քաղաքապետը նաեւ հայտնեց, որ ոստիկանությունը հսկելու է, որպեսզի պոտենցիալ վարակակիրները խստությամբ պահեն ինքնամեկուսացման ռեժիմը: Ասաց նաեւ, որ կչեղարկվի այսօր Էջմիածնի Զվարթնոց թաղամասում իր նախաձեռնությամբ «Այո»-ի քարոզարշավը՝ հաշվի առնելով, որ Էջմիածնում կա մեկ դեպք:
Լուսինե ԲՈՒԴԱՂՅԱՆ
