Մետաղական եւ ոչ մետաղական հանքարդյունահանողների`օրենքով արդեն իսկ սահմանված բնապահպանական վճարների մի մասը կհատկացվի ազդակիր համայնքներին՝ սոցիալական եւ առողջապահական ծրագրեր իրականացնելու համար. ԱԺ-ում այսօր առաջին ընթերցմամբ քննարկվում է «Ընկերությունների կողմից բնապահպանական հարկերի նպատակային վճարման մասին» օրենքում փոփոխությունների օրինագիծը:
Ինչպես նշեց ՀՀ տարածքային կառավարման եւ ենթակառուցվածքների փոխնախարար Լիլյա Շուշանյանը, նշյալ հատկացումը կիրականացվի, եթե համայնքը նախարարությանը ներկայացնի որեւէ սոցիալական կամ առողջապահական ծրագիր, ընդ որում՝ համայնքը ծրագիրը կարող է մշակել ոչ թե տվյալ տարի, այլ, օրինակ, երեք տարի անց, եթե այդ երեք տարվա բնապահպանական վճարի հատկացումների հանրագումարն է բավարար՝ ծրագիրն իրականացնելու համար:
Փոխնախարարը տեղեկացրեց, որ օրենքը գործելու է 2021թ.-ից: «Այդ ծրագրերը պետք է հրապարակվեն մարզպետարանների կայքերում: Մի քանի ազդակիր համայնք ունենալու դեպքում բաշխման կարգ կգործի, որը կսահմանի կառավարությունը»,-հավելեց Շուշանյանը:
Լուիզա ՍՈՒՔԻԱՍՅԱՆ
