Ցոլակ խաչատրյանը, որը պայքարում է իր արձակուրդայինների դիմաց վճարվելու համար, այսօր հացադուլ է հայտարարել եւ այն իրականացնում է կառավարության շենքի մոտ։ Ցոլակ Խաչատրյանը մի քանի տարի է` պայքարում է իր չվճարված արձակուրդայինների փոխհատուցման համար, նա մոտ 400 օր արձակուրդից չէր օգտվել ու չէր վճարվել արձակուրդների համար։
Ցոլակ Խաչատրյանն այսօր լրագրողների հետ զրույցում հիշեցրեց՝ ՊՆ-ն հրաժարվում է վճարել՝ հղում անելով հակասահմանադրական ճանաչված «Զինվորական ծառայության եւ զինծառայողի կարգավիճակի մասին» ՀՀ օրենքի 61-րդ հոդվածի 16-րդ մասին, որը դրանից մեկ ամիս առաջ էր հակասահմանադրական ճանաչվել, դրանով սահմանվում էր, որ միայն վերջին 2 տարիների արձակուրդայինի համար կարող է փոխհատուցվել նախկին զինծառայողը։
Նախկին զինծառայողն ասաց, որ մոտ 14 միլիոն դրամից վճարել են մոտ 4 միլիոն դրամը․«Պաշտպանության նախարարությունը չի կատարում դատարանի օրինական վճիռը, երեք ատյան իմ օգտին է որոշում կայացրել, բաց ՊՆ-ն դատարանի պահանջը չի կատարում»։
Հիշեցնենք, որ պաշտպանության նախարարի մամուլի խոսնակն այս տարվա հունիսին վստահեցրել էր, որ պաշտպանության նախարարը օրենքով իրեն վերապահված լիազորությունների շրջանակներում համապատասխան միջոցներ է ձեռնարկել պահեստազորի սպա Ցոլակ Խաչատրյանի մասով դատարանի օրինական վճիռը իրականացնելու ուղղությամբ։ Սակայն, ինչպես նախկին զինծառայողն է պնդում, մինչ օրս ոչինչ էլ չի արվել։
Կարդացեք նաև
Նելլի ԲԱԲԱՅԱՆ
Լուսանկարը՝ ankakh.com-ի
