Հայաստանում ախտահանող միջոցների արտադրություն կազմակերպելու համար առաջարկվում է պետական տուրք սահմանել: Այսօր այս մասին ասաց առողջապահության փոխնախարար Անահիտ Ավանեսյանը՝ ԱԺ տնտեսական հարցերի մշտական հանձնաժողովի նիստում: Տիկին Ավանեսյանը փոփոխության անհրաժեշտությունը պայմանավորեց բնակչության սանիտարահամաճարակային անվտանգության ապահովման մասին օրենքում տեղի ունեցած փոփոխությունով եւ ԵԱՏՄ տնտեսական միության առջեւ Հայաստանի ստանձնած պարտավորություններով: Նա հանձնաժողովի անդամներին ներկայացրեց «Պետական տուրքի մասին» օրենքում փոփոխություններ եւ լրացումներ կատարելու մասին նախագիծը:
Առողջապահության փոխնախարարի խոսքով, ներկայումս մի շարք կազմակերպությունների գործունեության գրանցումը իրականացնում է ՀՀ առողջապահության նախարարությունը. «Խոսքը, մասնավորապես՝ նոր գործունեության տեսակի՝ ախտահանող միջոցների մասին է: Դրանց արտադրության համար անհրաժեշտ է պետական տուրք վճարել»:
Հանձնաժողովը դրական եզրակացություն տվեց օրենսդրական այդ նախաձեռնությանը:
Լուսինե ԲՈՒԴԱՂՅԱՆ
