Հայաստանի քրեակատարողական հիմնարկներում իրենց պատիժը կրող անձինք նույնպես ցանկություն են հայտնել մեկնելու առաջնագիծ։ Մասնավորապես, «Արմավիր» ՔԿՀ-ի դատապարտյալների ու կալանավորված անձանց մեծամասնությունը դիմում են գրել՝ կամավոր ընդգրկվելու Արցախ մեկնող զորախմբերում։ «Պատրաստ ենք ռազմական դրությունից հետո վերադառնալ՝ շարունակելով կրել մեր պատիժը։ Թող չմտածեն, որ լարված իրավիճակը օգտագործում ենք ազատության մեջ հայտնվելու համար»,–նշեցին խմբագրություն զանգահարած դատապարտյալները։
ՀՀ արդարադատության նախարարության քրեակատարողական ծառայության հանրային կապերի բաժնի պետ, փոխգնդապետ Նոնա Նավիկյանը հաստատեց մեր տեղեկությունը՝ նշելով, որ խոսքը միայն «Արմավիր» ՔԿՀ-ին չի վերաբերում։ «Այո, ՔԿՀ-ներում պահվող ազատազրկված անձինք գրեթե միաձայն դիմում են ներկայացրել վարչակազմին՝ մասնակցելու Արցախյան ազատամարտին։ Նրանց անկեղծ ցանկությունն է հայ ժողովրդի կողքին լինել, սատարել հայրենիքին իրենց ուժերի ներածին չափով»,–ասաց տիկին Նավիկյանը։
«Հանուն ազատության» նախաձեռնող խմբի անդամ, «Վարդաշեն» ՔԿՀ-ի բաց ռեժիմի դատապարտյալ, ՀՀ Զինված ուժերի կապիտան, ներկայումս արձակուրդի մեջ գտնվող Բաբկեն Ղարդյանը մեր զրույցում նշեց, որ «Վարդաշեն» ՔԿՀ–ից մոտ 40 հոգի դիմում են գրել առաջնագիծ մեկնելու համար։ «Դիմումատուների մեջ կան տանկիստներ, հրետանավորներ, ռազմական գործին տեղյակ մասնագետներ։ Ես էլ այսօր դիմում գրեցի՝ վաղն եւեթ Արցախ մեկնելու համար»,–ասաց նա։
Նշենք, որ ռազմական դրության հետ կապված վաղ առավոտվանից ուժեղացված ծառայություն է քրեակատարողական հիմնարկներում։ Սկսած վարչակազմից՝ բոլոր աշխատողները ՔԿՀ-ներում էին։
Կարդացեք նաև
Արմեն ԴԱՎԹՅԱՆ
