«Պարզ է, որ հրամանագիրը Արցախի Հանրապետության պետական տարածքի նկատմամբ հավակնությունների լեգիտիմացման ձև է՝ ուղղված ներքին և արտաքին լսարանին»,- Aravot.am-ի հետ զրույցում ասաց ԱՀ նախագահի միջազգային հարաբերությունների հարցերով խորհրդական Նելլի Բաղդասարյանն՝ անդրադառնալով Ադրբեջանի նախագահ Իլհամ Ալիևի կողմից ստորագրված Ադրբեջանի տնտեսական շրջանների բաժանման նոր հրամանագրին:
Իլհամ Ալիեւի՝ Ադրբեջանի տնտեսական շրջանների բաժանման նոր հրամանագրում հայտնվել է նաեւ ԱՀ մայրաքաղաք Ստեփանակերտը՝ հերթական անգամ ակնհայտ տարածքային հավակնություններ դրսևորելով Արցախի Հանրապետության նկատմամբ:
«Փաստացի , «Ղարաբաղի տնտեսական շրջանի» մեջ ներառվել են Ադրբեջանի կողմից ժամանակավոր օկուպացված Արցախի Հանրապետության տարածքները, Արցախի Հանրապետության ներկա տարածքը, ինչպես նաև Արցախի Հանրապետության պետականության կարևոր ատրիբուտներից մեկը՝ ԱՀ մայրաքաղաք Ստեփանակերտը: Բացի տարածքային հավակնությունների հերթական դրսևորում լինելուց՝ հրամանագիրը պատասխան է ադրբեջանական ընդդիմությանը, որը մշտապես փաստում է Արցախի անկախ պետության առկայությունը և ռուս խաղաղապահների տեղակայումն Արցախում: Հրամանագիրը արտահայտում է Ադրբեջանը հավակնոտ ձգտումները՝ հակամարտությունը լուծել իր օգտին «զրոյական արդյունքով»: Փաստացի, շարունակվում է Ադրբեջանի կողմից միջազգային իրավունքով ստանձնած նորմերի խախտումը, մասնավորապես ՄԱԿ-ի կանոնադրության 2-րդ հոդվածի 4-րդ կետը»,- ասաց Նելլի Բաղդասարյանը՝ հավելելով, որ սա ահազանգ է հակամարտության կարգավորմամբ զբաղվող ԵԱՀԿ Մինսկի խմբի համանախագահությանը և նրա կողմից սահմանված երեք սկզբունքներին, որոնցից բավարարվում է դեռևս Ադրբեջանի տարածքային ամբողջականության սկզբունքը, որն ամեն օր նոր փաթեթավորմամբ է դրսևորվում և որևէ հակազդման չի արժանանում:
«Գտնվելով «հետաձգված կարգավիճակի» պայմաններում՝ Արցախի Հանրապետությունը շարունակում է օգտվել միջազգային իրավունքի ազգերի ինքնորոշման իրավունքի սկզբունքից և դրա արդյունքում ստեղծված պետականությամբ միջազգային ճանաչման հայտ ներկայացնել»,- ասաց մեր զրուցակիցը՝ նաեւ հավելելով, որ անկախ Ադրբեջանի հրամանագրերից, ԱՀ-ն առաջնորդվում է իր ներքին եւ արտաքին քաղաքական օրակարգով:
Կարդացեք նաև
Նելլի ԳՐԻԳՈՐՅԱՆ
