Օրերս կայացավ ռուսաստանաբնակ գրող Նոնա Բադալյանի «44 զարկի զարկերակներ» գրքի շնորհանդեսը: Գիրքը գրվել է պատերազմից հետո, նվիրված է ողջ եւ անմահացած հերոսների հիշատակին, գիրքը հրատարակել է «ՄԱՐԻ» հրատարակչությունը: Շնորհանդեսին ներկա էին ոչ միայն ընթերցողները, գրողի հարազատները, այլ հերոս տղաներն ու գրքում իրենց ներդրումն ունեցած մարդիկ:
Զրուցեցինք հեղինակի՝ Նոնա Բադալյանի հետ:
«Վաղուց եմ գրում, պատերազմն ինձ ստիպեց ավելի կարոտել հայրենիքս ու զգացածս հանձնել թղթին: Պատերազմը յուրաքանչյուր հայի մեջ ինչ-որ բան փոխել է, իսկ ինձ ստիպեց 44 օր ամեն օր գրել: Գրում էի բանաստեղծական ոճով, սակայն ասելիք միշտ կար ու շատ էր…Այսպես ծնվեց գիրքս»,-ասում է հեղինակը: Հավելում է, որ հերոսներին ընտրել է պատահականության սկզբունքով:
Կարդացեք նաև
«Հերոսներս 19 հոգի են, որոնք ամեն բան տվել են իրենց հայրենիքին, պայքարել հանուն թանկագին հողի: Գրքում տեղ գտած դեպքերն իրական են, որոնք պատմել են հենց հերոսները կամ անմահացած հերոսների հարազատները, ընկերները: Ամեն օրս լուսացրել եմ գրելով, առավոտյան կարդացել եմ գրածս, լաց եղել: Գնացել եմ Եռաբլուր եւ միայն այդ ժամանակ խաղաղված վերադարձել: ՌԴ-ում փորձել եմ գրելով խոսքս հասանելի դարձրել նաեւ տեղացիներին: Նոր գրքեր էլ, ի դեպ, սպասվում են, ընթացքի մեջ են»:
Նատալի ՄԿՐՏՉՅԱՆ
