Ի՞նչ կոնկրետ առաջարկներ է ներկայացրել Հայաստանը սահմանազատման, սահմանագծման աշխատանքների հետ կապված. այսօր վարչապետ Նիկոլ Փաշինյանը առցանց ասուլիսում խոսելով այս մասին՝ ասաց. «Առաջարկները ոչ թե հենց դեմարկացիայի մասին են, այլ հետեւյալի մասին՝ Սոչիում ընդունված եռակողմ հայտարարության մեջ նշված է, որ կողմերը պայմանավորվել են հայ-ադրբեջանական սահմանին անվտանգության եւ կայունության մակարդակը բարձրացնելու վերաբերյալ եւ գործը տանել դեմարկացիայի, դելիմիտացիայի»:
Փաշինյանն ասաց, որ հայկական կողմի առաջարկները գաղտնիք չեն, դա հայելային հետքաշման առաջարկն է: Ընդ որում, հայկական կողմը այդ առաջարկները ուղիղ փոխանցել է Ադրբեջանին, նաեւ ՌԴ-ին:
Ադրբեջանը, արձագանքելով այդ առաջարկների փաթեթին, նշել է, որ սահմանազատումն ու սահմանագծումը պետք է տեղի ունենա առանց որեւէ նախապայմանի:
«Մենք չենք փորձել փաստաթուղթ ձեւավորել, որը արտահայտում է զուտ Հայաստանի տեսակետները»,- ասաց Փաշինյանը՝ նշելով, որ այն կազմվել է քննարկումների արդյունքում: Ըստ վարչապետի, ինչքան շուտ ձեւավորվի սահմանագծման, սահմանազատման հարցերի հանձնաժողովը, այնքան լավ: Թե ով է մասնակցել հայկական կողմի առաջարկների ամփոփմանը՝ Փաշինյանն ասաց, որ ՌԴ-ն ունի մասնակցություն, նաեւ Ադրբեջանի դիտարկումներն են ներառել ու վերջապես Հայաստանի:
Կարդացեք նաև
Հռիփսիմե ՋԵԲԵՋՅԱՆ
