«Քննադատություններին առողջ, ողջամիտ ձեւով եմ անդրադառնում։ Գտնում եմ, որ ԲԴԽ-ն որոշումը կայացրել է օբյեկտիվորեն՝ փաստական հանգամանքներից ելնելով»,-լրագրողների հետ ճեպազրույցում այսօր ասաց ՀՀ բարձրագույն դատական խորհրդի անդամ Սերգեյ Չիչոյանը՝ անդրադառնալով դատավոր Բորիս Բախշիյանին կալանավորելու վերաբերյալ վարույթ իրականացնող մարմնին թույլտվություն տալու ԲԴԽ որոշման շուրջ քննադատություններին։
Հարցին՝ ԲԴԽ նախագահի պաշտոնակատար Գագիկ Ջհանգիրյանի կողմից ուղղորդում եղե՞լ է, որ ԲԴԽ անդամները կողմ քվեարկեն, Չիչոյանը պատասխանեց․ «Պարոն Ջհանգիրյանն ընդամենը խորհրդի անդամ է, իսկ այս պահին՝ նախագահի պաշտոնակատար։ Իհարկե, նման ցանկություն իր կողմից չեմ տեսել, բայց անգամ եթե ուզի էլ, չի կարող որեւէ ճնշում գործադրել։ Նա մեկ ձայնի իրավունք ունի, ինչպես եւ ԲԴԽ մյուս անդամները»։
Ինչ վերաբերում է դատավոր Վազգեն Ռշտունու հայտարարությանը, թե իր հանդեպ թիրախավորում կա, Սերգեյ Չիչոյանը նշեց․ «Չգիտեմ, թե նա ինչ հանգամանքներում է նման գնահատականներ հնչեցրել, բայց ես թիրախավորում չեմ տեսել։ Արդարադատության նախարարը բերել է վարույթ, որը կքննվի եւ պարզ կլինի՝ Ռշտունին արարք թույլ տվե՞լ է, թե ոչ։ Առհասարակ, նման հիմքեր չկան այդպիսի պնդումներ անելու։ ԲԴԽ-ն օբյեկտիվ է աշխատում իր լիազորությունների շրջանակում»։
Լրագրողները նաեւ նշեցին, որ ավելացել է արդարադատության նախարարության կողմից դատավորների հանդեպ հարուցված կարգապահական վարույթների թիվը, նպատակը պատժե՞լն է։ Սերգեյ Չիչոյանը պատասխանեց․ «Չէ, պատժելով չի։ ԲԴԽ-ն քննարկում է վարույթները։ Իսկ թե ինչու է նախարարությունն ակտիվացել, ես չեմ կարող ասել։ Ենթադրաբար, բողոքներն են շատացել, քաղաքացիները բողոքներ են հղել նախարարություն»։
Կարդացեք նաև
Լուիզա ՍՈՒՔԻԱՍՅԱՆ
