«Ոստիկանական պատնեշների թիկունքում հավաքվել էին Ազգային ժողովում, իրար ծափ էին տալիս, հույս էին տալիս, մի քիչ էլ դուխ էին տալիս, թե ամեն ինչ իրենց համար լավ է լինելու, ասում էին՝ ընդդիմությունը քաղաքական օրակարգ չունի եւ ինչքան էլ մեզ ասեն դավաճան, սրիկա, մեկ է, մենք գնալու ենք խաղաղության հետեւից եւ մեր ծրագիրը հասցնելու ենք ավարտին»,- այսօր Գարեգին Նժդեհի հրապարակում, «Դիմադրության» շարժման երթից առաջ, Նիկոլ Փաշինյանի՝ Ազգային ժողովում հնչեցրած հայտարարություններին անդրադարձավ ԱԺ փոխխոսնակ, ՀՅԴ Հայաստանի Գերագույն մարմնի ներկայացուցիչ Իշխան Սաղաթելյանը։
Նա վստահեցրեց, որ իշխանությունն իր ծրագիրն ավարտին չի հասցնելու. «Մենք շարունակելու ենք ասել՝ դավաճան եւ սրիկա, ու դա ունենալու է իր հետեւանքը: Դա հենց էնպես ենք ասում, դա ասում ենք, որպեսզի մեր այն քաղաքացիները, որոնք դեռ համոզված չեն, որ դրանք դավաճան են ու երկիրը տանում են ոչ թե խաղաղության, այլ հայրենազրկման, պետք է դուրս գան փողոց, միանան մեզ, որպեսզի օր առաջ սրանց հեռացնենք։ Նիկոլն ուզում է իր թիմին հույս տալ, որովհետեւ հասկանում է, որ այդ թիմը հենց վտանգն ամբողջությամբ զգաց, առաջինն է իրեն լքելու, այդ դավաճանը մնալու է ընդամենը մի քանի դավաճանների հետ»:
Նելլի ԳՐԻԳՈՐՅԱՆ
