Ադրբեջանի նախագահ Իլհամ Ալիևը Սամարղանդում Թյուրքական պետությունների կազմակերպության 9-րդ համագումարում իր ելույթում շեշտել է, որ Հայաստանի և Ադրբեջանի առաջնորդները Պրահայում և Սոչիում համատեղ հայտարարություններով ճանաչել են միմյանց ինքնիշխանությունն ու տարածքային ամբողջականությունը:
«Այդպիսով Ղարաբաղյան հակամարտությունը մնացել է անցյալում»,- ասել է Ալիևը:
Նա նաև հերքել է հայկական կողմի մեղադրանքները սեպտեմբերին հայ-ադրբեջանական սահմանին պատերազմ սանձազերծելու վերաբերյալ:
«Չնայած երկու տարի առաջ ավարտվեց Ղարաբաղյան երկրորդ պատերազմը, Հայաստանը շարունակում է ռազմական սադրանքներ իրականացնել Ադրբեջանի հետ սահմանին: Նման վերջին սադրանքն իրականացվեց ընթացիկ տարվա սեպտեմբերին, և Ադրբեջանի զինված ուժերը ստիպված էին հակահարձակողական գործողություն ձեռնարկել՝ Հայաստանի լայնածավալ ռազմական սադրանքը կանխելու համար»,- ասել է Ալիևը:
Կարդացեք նաև
Նա հավելել է, որ Հայաստանն անհիմն կերպով Ադրբեջանին է մեղադրում ագրեսիայի մեջ: «Հայաստանը միջազգային հանրությանը մոլորեցնելու նպատակով փորձում է անհիմն կերպով Ադրբեջանին մեղադրել ռազմական ագրեսիայի մեջ: Մենք կտրականապես հերքում ենք նման անհիմն մեղադրանքները: Մենք կռվել ենք մեր հողերի համար, և հաղթելով հայկական բանակին՝ նրանց դուրս ենք վռնդել մեր պատմական տարածքներից»,- ասել է նա՝ հավելելով, որ Ադրբեջանի զինված ուժերը սահմանին «այս պահին զբաղեցնում են դիրքեր հայրենի հողում»:
Ի դեպ, ՀՀ վարչապետ Նիկոլ Փաշինյանն այսօր իր թվիթերյան էջում գրել է. «Իր վերջին ելույթում նախագահ Ալիևը կոպտորեն խախտել է Սոչիի եռակողմ հայտարարությամբ նախատեսված` ուժի սպառնալիքից կամ դրա կիրառումից զերծ մնալու մասին համաձայնությունը։ Տարօրինակ է, որ նա Հայաստանին է մեղադրում փոխհամաձայնեցված հայտարարությունները խախտելու մեջ»:
Պատրաստեց Վիկտորյա ԱՆԴՐԵԱՍՅԱՆԸ
In his latest speech, president Aliyev flagrantly violated the agreement on refraining from the threat or use of force, stipulated in Sochi trilateral statement. Oddly enough, he accuses #Armenia of violating mutually agreed statements!
— Nikol Pashinyan (@NikolPashinyan) November 11, 2022
