Հունվարի 12-ին ՀՀ հակակոռուպցիոն դատարանում տեղի ունեցավ Երևանի նախկին քաղաքապետ, կապի և տրանսպորտի նախկին նախարար Գագիկ Բեգլարյանին պատկանող ենթադրյալ ապօրինի ծագում ունեցող գույքի բռնագանձման գործով դատական հերթական նիստը։
Հիշեցնենք՝ ըստ ՀՀ գլխավոր դատախազության հաղորդագրության՝ «Գլխավոր դատախազությունում ուսումնասիրվել է Ազգային անվտանգության ծառայության քննչական դեպարտամենտում քննվող քրեական վարույթը, որի ընթացքում պարզվել է, որ 2002-2010 թվականների ընթացքում Երևան քաղաքի «Կենտրոն» թաղային համայնքի ղեկավարի, այնուհետև Երևանի քաղաքապետի պաշտոնը զբաղեցրած Գ.Բ.-ն, պաշտոնեական դիրքն օգտագործել է ծառայության շահերին հակառակ, ինչպես նաև պաշտոնեական դիրքի օգտագործմամբ, յուրացման եղանակով հափշտակել է առանձնապես խոշոր չափերի՝ Երևան քաղաքում և այլ բնակավայրերում գտնվող բազմաթիվ անշարժ գույքեր»։
Խոսքը շուրջ 16.8մլրդ դրամ արժեքով ապօրինի ծագման գույքն ու ակտիվները Գագիկ Բեգլարյանից և նրան փոխկապակցված անձանցից բռնագանձելու մասին է։
Aravot.am-ի հետ զրույցում Գագիկ Բեգլարյանի պաշտպան Գոռ Օհանյանը տեղեկացրեց՝ գործը նախնական դատական լսումների փուլում է։ Տեղի են ունենում նախնական դատական նիստեր․ «Բազմաթիվ հարցեր կան քննարկելու, գույքի բռնագանձման հարց չի քննարկվել։ Այսօրվա դատական նիստում մենք քննարկել ենք նախնական դատական նիստերի հետ կապված հարցեր, մասնավորապես հայցադիմումը, հայցը, պատասխանը։ Ներկայացրել ենք հայցադիմումի պատասխանն ու մեր դիրքորոշումը։ Որևէ այլ գործողություն չի կատարվել»։
Կարդացեք նաև
Տաթև ՀԱՐՈՒԹՅՈՒՆՅԱՆ
