Դեկտեմբեր ամսից ավելի սրված սուր շնչառական վարակներով պայմանավորված, Վանաձորի բժշկական կենտրոնի մանկական սոմատիկ ու թերապեւտիկ բաժանմունքներն աշխատում են ծանրաբեռնված գրաֆիկով:
Թեեւ նախորդ շաբաթ հիվանդությունը փոքր-ինչ հետընթաց է արձանագրել, մասնագետները բարձրաձայնում են, որ քաղաքացիները շարունակում են զբաղվել ինքնաբուժությամբ, ինչն էլ իր հերթին բարդացնում է իրավիճակը:
Թիրախային խմբում հատկապես մինչեւ 18 տարեկան երեխաներն են ու 65 տարեկանից բարձր խրոնիկ հիվանդություններ ունեցող անձինք. «Թիրախային խումբը 0-ից 3 տարեկան երեխաներն են, իհարկե այն երեխաները, որոնք կարիք ունեն հոսպիտալացման: Պարզապես խոսքը վերաբերում է հոսպիտալացման անհրաժեշտությանը, այսինքն` բարդություններով դեպքերին: Դա կլինի համառ ջերմությունը, շնչարգելությունը, երեխաների մոտ ուղեկցող վիճակները՝ փսխումային սիմպտոմ, երբեմն նաեւ աղիքային սիմպտոմի ձեւով դրսեւորումներ, որոնք պայմանավորված են վիրուսային ծագումով»,-ասում է ՎԲԿ-ի մանկաբույժ Իդա Կիրակոսյանը, միաժամանակ նշելով, որ բաժանմունքը եւ՛ հոսպիտալացված դեպքերի առումով, եւ՛ դիմելիության առումով կրկնակի ցուցանիշներ է գրանցել. «Եղել են օրեր, որ 34 մահճակալ հագեցվածությամբ բաժանմունքում ստիպված հոսպիտալացվել են 60 եւ ավելի թվաքանակ հիվանդներ: Վերջին ամիսներին, ինչու չէ նաեւ տարիներ շարունակ բաժանմունքն աշխատում է գերհագեցված պայմաններում: Գրեթե միշտ մահճակալների եւ հիվանդաքանակի թիվը չի համապատասխանում»:
Այս պահին հոսպիտալացված հիվանդների թիվը 40 է: Իսկ գերակշռողը մինչեւ 1 տարեկան երեխաներն են:
Իսկ ՎԲԿ-ի թերապեւտ Անահիտ Թամրազյանը լրագրողների հետ զրույցում նշում է, որ իրենց բաժանմունքում այս պահի դրությամբ բուժում են ստանում հիմնականում միջին տարիքի մարդիկ. «Մեծահասակները մի քիչ ուշացած են եղել: Ծանր ընթացք են ունենում ուղեկցող հիվանդություններ ունեցողները՝ դիաբետիկները, ճնշում ունեցողները: Ներկա պահին բաժանմունքում ունենք 25 հիվանդ, որից 20-ի մոտ կան եւ՛ բրոնխիտ, եւ՛ թոքաբորբ»:
Կարդացեք նաև
Մասնագետները նշում են, որ հիվանդության աճ նկատվել է դեկտեմբերի կեսերին, այս պահին նկատում են արդեն վիրուսի հետընթաց:
Տաթեւիկ ՂԱԶԱՐՅԱՆ
