Երևանի թատրոնի և կինոյի պետական ինստիտուտում ապրիլին կայանալու է հանրապետական երիտասարդական գիտաժողով, որին կարող են մասնակցել Հայաստանի և Արցախի բուհերի ուսանողները, շրջանավարտները, երիտասարդ գիտնականներ։ Այս մասին մեզ հետ զրույցում ասաց ինստիտուտի Ուսանողական գիտական, ստեղծագործական ընկերության նախագահ Վովա Արզումանյանը։
Մեր զրուցակիցը տեղեկացրեց, որ գիտաժողովը նվիրվում է թատրոնի և կինոյի դերասան Սոս Սարգսյանի վառ հիշատակին և կրում է «Արվեստը ժամանակի մեջ, ժամանակը` արվեստի» խորագիրը։
-Բացի մեր ինստիտուտի մասնագիտություններից, գիտական նստաշրջանում ներառել ենք այնպիսի ուղղություններ, ինչպիսիք են բանասիրությունը, մանկավարժությունը, մշակութաբանությունը, մարքեթինգը և PR-ը, երաժշտագիտությունը, որպեսզի ավելի լայն շրջանակներ կարողանան մասնակցել մեր գիտաժողովին, -նշեց Արզումանյանը, ավելացնելով, որ գիտաժողովին մասնակցելու համար անհրաժեշտ է մինչև մարտի 10-ը Ուսանողական գիտական, ստեղծագործական ընկերության էլ. հասցեին ուղարկել գիտական հոդվածն ու մասնակցության հայտը, որոնք անցնելու են մասնագիտական դիտարկման փուլ և միայն դրական արդյունքի պարագայում հաստատվելու է հայտատուի մասնակցությունը:
Մեր զրույցի վերջում Վ. Արզումանյանը նշեց` պետք է նաև գիտությամբ պայքարել ժամանակի արվեստը պահպանելու, զարգացնելու, տարածելու համար։
Կարդացեք նաև
ԻԶԱ ԱՍԾԱՏՐՅԱՆ
ԵՊՀ Ժուռնալիստիկայի ֆակուլտետի լրագրության բաժին, 4-րդ կուրս
