«Միացյալ Թագավորության դիրքորոշումը ղարաբաղյան հակամարտության հետ կապված չի փոխվել։ Միացյալ Թագավորությունն ուզում է տեսնել համապարփակ խաղաղություն հնարավորինս շուտ»,- ՀՀ ԱԳՆ-ում հրավիրված ՀՀ ԱԳ նախարար Արարատ Միրզոյանի հետ համատեղ մամուլի ասուլիսի ժամանակ հայտարարեց Միացյալ Թագավորության Եվրոպայի հարցերով պետնախարար Լեո Դոքերթին։
Լրագրողների հիշեցրին՝ փետրվարին իր՝ Բաքու կատարած այցի ժամանակ Ադրբեջանն արդեն շրջափակել էր Լաչինի միջանցքը և փաստեցին՝ գաղտնիք չէ, որ Միացյալ Թագավորությունը էներգետիկ համագործակցություն է խորացնում Ադրբեջանի հետ, որը նաև Ադրբեջանը՝ որպես կանաչ լույս է օգտագործում իր ագրեսիվ պահվածքի համար։ Այնուհետև հարցրին՝ արդյոք բարձրացրե՞լ եք Լաչինի հարցը Բաքվում, որպես ՄԱԿ-ի ԱԽ երկիր՝ ի՞նչ ազդեցություն կարող եք ունենալ միջանցքի բացման հարցում, Միացյալ Թագավորության պետնախարարը պատասխանեց․ «Անշուշտ, այդ հարցն ուղղակիորեն Բաքվում բարձրացվել է։ Դա կարևոր բաղադրիչ էր այդ հանդիպման համար։ Մենք բարձրացրել ենք մարդկանց ազատ տեղաշարժի վերականգնման հարցը։ Մեր հարաբերությունները, այո, նույնքան կարևոր են Ադրբեջանի հետ, որքան ՀՀ-ի, բայց մենք միշտ հստակ ենք եղել, որ այս շարունակական հակամարտությունը կայուն խաղաղության չի կարող հանգեցնել, դրան միայն կարող ենք հասնել սեղանի շուրջ։ Դա է պատճառը, որ մենք քաջալերում ենք ԵՄ-ԱՄՆ ձևաչափը՝ այս հարցը առաջ մղելու համար։ Մենք կփորձենք ազդեցություն գործել բոլոր կողմերի վրա՝ փորձելով այս հարցը հանգուցալուծման տանել»։
Տաթև ՀԱՐՈՒԹՅՈՒՆՅԱՆ
