Եվրոպայի խորհրդի խորհրդարանական վեհաժողովի (ԵԽԽՎ) նախագահ Թինի Քոքսն այսօր հանդես է եկել հետևյալ հայտարարությամբ.
«Հաշվի առնելով Լեռնային Ղարաբաղում հումանիտար և մարդու իրավունքների իրավիճակի շարունակվող վատթարացումը՝ ես հիշեցնում եմ հունիսի 20-ի Վեհաժողովի խնդրանքը Եվրոպայի խորհրդի Նախարարների կոմիտեին՝ հնարավորինս շուտ փաստահավաք առաքելություն կազմակերպել Ադրբեջան` նպատակ ունենալով գնահատել այն իրավիճակը, որում հայերն ապրում են և որից տուժել են 2022թ. դեկտեմբերի 12-ից հետո Լաչինի միջանցքով ազատ և անվտանգ մուտքի բացակայության հետևանքով:
Ես միանում եմ 2023թ. հուլիսի 28-ին Եվրոպայի խորհրդի գլխավոր քարտուղարի հնչեցրած երկխոսության կոչին և կոչ եմ անում և՛ Ադրբեջանին, և՛ Հայաստանին, որպես Եվրոպայի խորհրդի անդամ պետություններ, վերջապես պահպանել 1991թ. ստանձնած իրենց փոխադարձ պարտավորությունները` լարվածությունը թուլացնելու և իրենց երկրների միջև խաղաղությունը վերականգնելու համար»։
