«Արժանապատվության շարժումը», որը վերանվանվել է «Զանգ» շարժման, այսօր Մաշտոցի պուրակում ազդարարեց գործողությունների մեկնարկը։ Պուրակում տեղադրվեց պետության, տան սիմվոլ վրանը. նախաձեռնության անդամներն ակնկալում են, որ առաջիկա օրերին իրենց կմիանան ՀՀ քաղաքացիները` այս խորհրդանիշը պահելու համար։
Նախաձեռնության անդամ, «Քաղաքացու որոշում» կուսակցության նախկին հիմնադիր անդամ Սուրեն Սահակյանն ասաց, որ օգոստոսի 16-ից հետո, 50 օր շտաբային քննարկումների արդյունքում որոշել են սկսել մի գործընթաց, որը, կարծում են, ավելի ապահով ու արժանապատիվ Հայաստանի կհանգեցնի։ Ըստ նրա, հարցն այն չէ, թե Ադրբեջանն ինչ է անում, այլ այն է, որ մենք հանձնվում ենք, ու դա հոգեբանական փոփոխությունների է բերում։ Իր համար հարց է` ինչպիսի՞ քաղաքացի ենք վաղն ունենալու` պարտվա՞ծ, թե՞ արժանապատվությունը վերագտած։
Ադրբեջանագետ, ՔՊ-ական նախկին պատգամավոր Տաթևիկ Հայրապետյանն էլ ասաց` Հայաստանի նկատմամբ սպառնալիքները 2020 թվականից են, բայց իրենք հիմա են փողոց դուրս եկել, քանի որ լուրջ ռիսկ կա. «2-3 ամսից կարող ենք հատել անդառնալիության կետը` ՀՀ ունենալու հարցում»։ Նա հիշեցրեց, որ Պրահայում` Նիկոլ Փաշինյանի կողմից Արցախը Ադրբեջանի մաս ճանաչելուց հետո, Իլհամ Ալիևը հայտարարել էր, որ Արցախի հարցը լուծված է, հիմա թիրախը Հայաստանն է ու առաջին անգամ, Ադրբեջանում, պետական մակարդակով մեր երկիրը կոչվում է «Արևմտյան Ադրբեջան»։
Կարդացեք նաև
«Քաղաքացու որոշում» կուսակցության նախկին անդամ Միքայել Նահապետյանն էլ ասաց` պիտի փորձեն մարդկանց վախերը կոտրել, որ կանգնեն այն նպատակի ու ճանապարհի կողքին, որն իրենք են առաջարկում։
Այլ մանրամասները` տեսանյութում
Նելլի ԳՐԻԳՈՐՅԱՆ
