«Միասնական հայրենիք» կուսակցության մեկնաբանությունը Oragir.news-ին
–Օրերս Արցախի քաղաքական և հասարակական ուժերը հանդես են եկել միասնական ուղերձով։ Առաջին բանը, որ աչքի է զարնվում այն է, որ խորհրդարանական ուժերից միայն «Միասնական հայրենիք»-ն է միացել ուղերձին։ Ինչո՞վ է սա պայմանավորված։ Արդյո՞ք դուք եք հեղինակել ուղերձի տեքստը։
-Ուղերձի տեքստը մեզ ուղարկվել է ԱԺ պատգամավորներից մեկի կողմից՝ միանալու նպատակով։ «Միասնական հայրենիք» կուսակցությունը տեքստին ծանոթանալուց հետո իր դիտարկումներն է արել՝ առաջարկելով վերանայել մի շարք ձևակերպումներ, որոնք բառացիորեն կրկնում են հակամարտության լուծման 30-ամյա պահանջ-թեզերը։ Ի պատասխան նշվել է, որ տեքստը հեղինակել են միջազգային իրավունքի մասնագետներ և, եթե ուղերձին միացող յուրաքանչյուր սուբյեկտ իր փոփոխություններն առաջարկի, սահմանված ժամկետում հնարավոր չի լինի հրապարակել այն։
«Միասնական հայրենիք» կուսակցությունը ոչ միայն չի տիրապետում մյուս կուսակցությունների՝ ուղերձին չմիանալու պատճառներին, այլև ուղերձի հրապարակումից հետո է տեղեկացել, որ վերջիններս չեն միացել։
Կարդացեք նաև
–Կարո՞ղ եք մանրամասնել, թե ի՞նչ բնույթի դիտարկումներ եք արել, որոնք չեն ընդունվել։
-Համաձայն ադրբեջանական պնդումների, ի հեճուկս միջնորդական առաքելությունների, Ադրբեջանն ուժի կիրառմամբ վերջնականապես լուծել է ԼՂ խնդիրը։ Մյուս կողմից՝ արցախյան կողմը շարունակում է պնդել, որ ազատ, անկախ և ինքնիշխան Արցախի Հանրապետությունն այլընտրանք չունի։
Նման անպտուղ քաղաքական օրակարգի փոխարեն՝ մենք առաջարկում ենք ձևակերպել ԼՂ կարգավիճակի և բնակչության վերադարձի շուրջ Ադրբեջանի հետ ուղիղ բանակցությունների օրակարգ և դեմ առ դեմ գտնել փոխադարձաբար ընդունելի մոտեցումներ և սկզբունքներ։
–Ուղերձում խոսք է գնում ՄԱԿ–ի խաղաղապահության մասին։ ՌԴ–ն կարո՞ղ է վետո կիրառել Արցախը ՄԱԿ–ի կառավարմանը փոխանցելու հարցի վրա։ Եթե այո, ապա ինչպե՞ս է հնարավոր հաղթահարել ռուսական վետոն։
-Մենք մշտապես հասարակական-քաղաքական խոսույթ ենք ձևավորել՝ հղում անելով այս կամ այն աշխարհաքաղաքական սուբյեկտների հնարավոր կարծիքին կամ դիրքորոշմանը։ Եթե ԼՂ հակամարտության ուղղակի կողմերը՝ Լեռնային Ղարաբաղն ու Ադրբեջանը, ուղիղ երկխոսության ուժ գտնեն իրենց մեջ, այլևս որևէ միջնորդության, այդ թվում՝ խաղաղապահ, անհրաժեշտություն չի լինի։
