«2021 թվականի Ազգային ժողովի արտահերթ ընտրություններից հետո ՏԻՄ ընտրություններում տեսնում ենք բավական լուրջ խնդիրներ»,- այսօր Ընտրական օրենսգրքի փոփոխությունների եւ ՏԻՄ-երում համամասնական ընտրակարգի կիրառմանը նվիրված քննարկման ժամանակ ասաց Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը։ Նրա խոսքով՝ կան լուրջ խնդիրներ՝ թե օրենսդրական կարգավորումների, եւ թե պրակտիկայի առումով։
«Բոլորիս աչքի առաջ եղել են հրապարակումները, հարցերը, որոնց անդրադարձել ենք։ Առանձին համայնքներում տեղական ինքնակառավարման մարմինների ընտրությունների հետ կապված բավականին լուրջ մտահոգություններ ենք արձանագրել եւ փորձեցինք ի մի բերել այս ամենը։ Ցավոք սրտի, պետք է արձանագրենք, որ, այո, առանձին համայնքներում նաեւ տեղի է ունենում իշխանության կամ տեղական ինքնակառավարման մարմինների զավթում։ Բայց զարմանալի է այն, որ դա տեղի է ունենում նաեւ դատական համակարգի ներգրավմամբ, որը մենք տեսանք Վանաձոր համայնքում»,- ասաց Արթուր Սաքունցը։ Նրա խոսքով՝ ազատ եւ արդար ընտրությունների ինստիտուտը ժողովրդավարական երկրների այն եզակի ինստիտուտներից է, որը պետք է վստահության առումով երաշխավորված լինի։
Փորձագետ Վարդինե Գրիգորյանն ասաց, որ շարունակում է մնալ այն խնդիրը, որ ընտրություններին մասնակցող հիմնական կուսակցությունների մոտ չկա պատկերացում քաղաքային իշխանության մասին։ Կուսակցությունների մոտ կա պատկերացում ԱԺ ընտրություններին մասնակցելու մասին, բայց համայնքի մակարդակով ընտրությունների վերաբերյալ՝ ոչ։ Սրա արդյունքում՝ օգտվում է իշխող ուժը։ «Եվ ստացվում է, որ եթե նախկինում մենք շատ հստակ ունեինք ՏԻՄ-երի հանրապետականացում, ժամանակի հետ ունենում ենք տեղական մակարդակում ՔՊ-ացում»,- ասաց նա։
Արթուր Սաքունցն էլ հավելեց, որ դժվար է ասել, թե ինչքան ժամանակ կպահանջվի, որպեսզի կուսակցությունները ՏԻՄ մակարդակում կայանան․ «Բայց մեր քննարկման իմաստն այն է, վեր հանենք հարցը, թե ինչքանո՞վ են օրենսդրական կարգավորումները նպաստում այդ քաղաքական համակարգի ձեւավորմանը»։
Կարդացեք նաև
Ռոզա ՀՈՎՀԱՆՆԻՍՅԱՆ
