Ցյուրիխում հայ համայնքի հետ հանդիպման ժամանակ Սփյուռքի գործերով հանձնակատար Զարեհ Սինանյանի եւ համայնքի ներկայացուցիչ Կարո Օհանյանի միջեւ միջադեպ էր գրանցվել: Զարեհ Սինանյանը Արցախի դրոշն ուսերին գցած սփյուռքահային պիտակավորել էր որպես «մերժված» եւ «30 տարի չընտրված իշխանության ներկայացուցիչ»։ Պատճառն այն էր, որ Կարո Օհանյանը նրան հարցնում էր, թե ինչպես կարող էին սկզբում ասել «Արցախը Հայաստան է եւ վերջ», իսկ հիմա ասում են «Արցախն Ադրբեջան է եւ վերջ»:
Միջադեպը փորձել էր հարթել համայնքային գործիչ Մանուկ Մալխասյանը:
Aravot.am-ը Մանուկ Մալխասյանից հետաքրքրվեց, թե ինչո՞ւ էր ծագել միջադեպը: «Միջադեպի պատճառը Արցախի դրոշն էր, որը հունից հանեց Զարեհ Սինանյանին: Մնացածն արդեն իսկ տեսել եք։ Ես ստիպված էի միջամտել, որովհետեւ խոսակցությունն արդեն ուրիշ ուղղությամբ էր գնում, ներքաղաքական աստառ էր ստանում»,-ասաց մեր զրուցակիցը:
Կարդացեք նաև
Խնդրեցինք ներկայացնել Ցյուրիխի փոքրիկ հայկական համայնքը եւ հարցրինք, թե ինչ սպասելիքներ ունեին Սփյուռքի հանձնակատարի հետ հանդիպումից: «Մեր համայնքը մեծ չէ, սակայն տարակազմ է՝ բաղկացած հայաստանցիներից եւ դասական բազմաշերտ սփյուռքից։ Այսպես ասած՝ կոնգլոմերատ է: Կան համայնքային տարբեր կառույցներ, Հայ առաքելական եկեղեցու ծխական խորհուրդը, 3 տարի է, ինչ գործում է կիրակնօրյա հայկական դպրոցը:
Ինչ վերաբերում է հանդիպմանը, կոնկրետ ես ակնկալում էի գոնե նվազագույն հետաքրքրվածություն Ցյուրիխի ներհամայնքային կյանքի, կառուցվածքի եւ խնդիրների վերաբերյալ։ Սակայն պարոն Սինանյանի կողմից նմանատիպ ոչ մի անդրադարձ չեղավ։ Հանդիպումը լի էր կոնֆլիկտներով եւ ըստ իս՝ անարդյունավետ։ Շատ մտահոգիչ էր նաեւ թե՛ Ժնեւում եւ թե՛ Ցյուրիխում Հայ առաքելական եկեղեցու ներկայացուցիչների բացակայությունը, ինչն, անկասկած, Հայաստանի ներկայիս իշխանությունների վարած հակաեկեղեցական քաղաքականության հետեւանք է»,-ասաց Մանուկ Մալխասյանը:
Գոհար ՀԱԿՈԲՅԱՆ
Լուսանկարը՝ orer.eu-ից:
