Aravot.am-ին տեղեկություններ են հասել այն մասին, որ մարտի 18-ին՝ 3 օր առաջ, Գյումրու թիվ 19 հիմնական դպրոցում վիճաբանություն էր տեղի ունեցել վարչատնտեսական մասի նորանշանակ համակարգողի ու դաստիարակչական գծով փոխտնօրենի միջև։
Դպրոցում հնչել են հայհոյանքներ, երկու տղամարդկանց վիճաբանությունը վերածվել է ծեծկռտուքի։
Եվ այս ամենը կատարվել է աշխատասենյակի համար։
Դպրոցի նորանշանակ պաշտոնյան՝ վարչատնտեսական մասի համակարգող՝ Գ․Կ-ն, հրավիրվելով ոստիկանության «Մուշ» բաժին, հայտնել է, որ մարտի 18-ին, ժամը 14․00-ի սահմաններում դպրոցի տնօրենի ՄԿԱ գծով տեղակալ Ս․Մ․-ն աշխատասենյակի հարցի շուրջ առաջացած խոսակցության ժամանակ վիճաբանել է իր հետ, որի ընթացքում իր հասցեին հնչեցրել է հայհոյանքներ, ձեռքերով և ոտքերով հարվածներ է հասցրել մարմնի տարբեր մասերին՝ այտի շրջանում պատճառելով քերծվածքներ։
Կարդացեք նաև
Նրանից ընդունվել է հաղորդում, որն ուղարկվել է Շիրակի մարզային քննչական վարչություն։
Aravot.am-ն այս թեմայի շուրջ պարզաբանումներ խնդրեց Գյումրու թիվ 19 հիմնական դպրոցի տնօրենի ժ/պ Արտակ Մարտիրոսյանից՝ հետաքրքրվելով, թե այս ամենը կատարվե՞լ է աշակերտների աչքի առաջ։
Արտակ Մարտիրոսյանը հրաժարվեց մեկնաբանել կատարվածը՝ նշելով, որ գործը իրավական տիրույթում է։
Նա, սակայն, հարկ համարեց պարզաբանել, որ այդ երկու անձանցից բացի ոչ մեկն ականատես չի եղել այս միջադեպին, դպրոցից ոչ մեկը ո՛չ լսել է, ո՛չ տեսել։ Ինքն անձամբ այդ մասին տեղեկացել է տարածված խոսակցություններից։
Նունե ԱՐԵՎՇԱՏՅԱՆ
