Ասուլիսում հնչած հարցին՝ Հունգարիայի վետոյի պատճառով ԵՄ-ն մերժեց Հայաստանին անվտանգային աջակցություն ցուցաբերել Խաղաղության եվրոպական հիմնադրամի միջոցներով, արդյոք ԵՄ-ն եւս մեկ փորձ կանի Հայաստանին աջակցելու գործընթաց նախաձեռնել կամ ԵՄ-ն քննարկո՞ւմ է այլընտրանքային խողովակներով Հայաստանին աջակցել, ՀՀ-ում ԵՄ պատվիրակության ղեկավար, դեսպան Վասիլիս Մարագոսն այսպես արձագանքեց. «Խորհրդի նիստի ժամանակ մենք անդամ պետությունների հետ քննարկեցինք, թե ինչպես աջակցել Հայաստանի դիմակայությանը, ինչպես աջակցել այն կարիքներին, որոնք Հայաստանն է ձեւակերպել անվտանգության բնագավառում: Այդ պահին ԵՄ անդամ պետությունները պայմանավորվեցին քննարկել երկու հնարավորություն:
Նախ ոչ մահաբեր աջակցություն ցուցաբերել Հայաստանին Եվրոպական խաղաղության հիմնադրամի միջոցով, ինչպես նաեւ ավելացնել ԵՄ դիտորդական առաքելության անդամների թիվը: Դիտորդական առաքելության հարցում մենք խոստումը կատարում ենք, նոր դիտորդները տեղակայման փուլում են: Ինչ վերաբերվում է ԵՄ խաղաղության հիմնադրամին, քննարկումները շարունակվում են խորհրդում»:
ԵՄ դեսպանի խոսքով. «Դեռ չափազանց վաղ է այս փուլում մանրամասների վերաբերյալ խոսելը, բայց մենք հույս ունենք, որ դա շուտով կավարտվի»:
Գոհար ՀԱԿՈԲՅԱՆ
