Սեպտեմբերի 24-ին Արամ Խաչատրյանի տուն-թանգարանում կայացավ «Ծնվել եմ Արցախում» կրթական ծրագրի առաջին համերգը՝ «Երաժշտություն, որը ծնվել է Արցախում» խորագրով։
Հրավիրված գործընկերների, աջակիցների, համայնքի և երաժշտասեր համայնքի ներկայացուցիչների ներկայությամբ բեմ դուրս եկան ծրագրի բոլոր 23 մասնակիցները։
Այս յուրահատուկ համերգը միաժամանակ և հուզիչ էր, և հուսադրող․ տարբեր տարիքի Արցախից տեղահանված պատանի երաժիշտները ներկայացրին դասական ստեղծագործություններ՝ փոխանցելով ոչ միայն իրենց մասնագիտական առաջընթացը, այլև հույսի ու տոկունության ուղերձ։ Յուրաքանչյուր հնչյունում կենդանի էր Արցախի հիշողությունը, մշակութային ժառանգությունը և ապագայի հանդեպ վստահությունը։
Կարդացեք նաև
Ծրագրի առաջին համերգը դարձավ խորհրդանշական հանգրվան՝ ամփոփելով վերջին ամիսներին սաների անցած ճանապարհը և ցույց տալով, որ երաժշտության միջոցով հնարավոր է ոչ միայն դիմակայել ամենադաժան փորձություններին և պահպանել մշակութային ինքնությունը, այլև դառնալ նոր կյանքի սկիզբ։
—
«Ծնվել եմ Արցախում» կրթական ծրագրի նպատակն է պահպանել և զարգացնել Արցախում ծնված, այսօր Հայաստանում ապրող տաղանդավոր պատանի երաժիշտների մշակութային ժառանգությունը։ Ծրագրի գաղափարը դիրիժոր, UNICEF-ի ազգային դեսպան Սերգեյ Սմբատյանինն է։ Ծրագրի շրջանակում ընտրված 23 պատանի երաժիշտներ 5 տարի շարունակ ստանալու են խորացված մասնագիտական կրթություն և հնարավորություններ՝ ելույթ ունենալու աշխարհի տարբեր բեմերում հնչեցնելով՝ «Ծնվել եմ Արցախում» արտահայտությունը։
Ծրագիրն իրականացվում է «Հայաստան» համահայկական հիմնադրամի և հիմնադրամի Գերմանիայի և Նիդերլանդների տեղական կառույցների, Կարո Սարգսյանի, Ամերիկայի հայ ավետարանչական ընկերակցության Հայաստանի մասնաճյուղի, «Ցե-Կվադրատ Ամպեգա Ասեթ Մենեջմենթ Արմենիա» ՍՊԸ, «ԴԻԱԼՈԳ» կազմակերպության, «Մենք ենք մեր սարերը» զարգացման գործակալության, «Իգնայթ» ՍՊԸ և Հայկ Եգանյանի աջակցությամբ։
