«Ուժեղ Հայաստան» կուսակցության խորհրդի անդամ Նարեկ Կարապետյանից այսօր լրագրողները հետաքրքրվել են՝ ինչու Սամվել Կարապետյանը, որպես կուսակցության առաջնորդ, չի լրացնում կուսակցության համար սահմանված հայտարարագիրը՝ հաշվի առնելով, որ արդեն մի անգամ բաց է թողել սահմանված ժամկետը, լրացուցիչ սահմանված երեսունօրյա ժամկետն էլ մոտենում է ավարտին։
«Մենք պետք է հիշենք՝ ում մասին է խոսքը ու ինչ հնարավորությունների մարդու մասին է խոսքը, միգուցե ավելի բարդ է հայտարարագիր կազմելը, քան այլ դեպքերում»,- այսօր ասուլիսի ժամանակ ասաց Նարեկ Կարապետյանը։
Կարդացեք նաև
Հարց հնչեց նաև «Հայաքվեի» հետ հուշագրի ստորագրման ու համագործակցության մասին, ինչին ի պատասխան Նարեկ Կարապետյանն ասաց, որ «Հայաքվեում» կան պրոֆեսիոնալներ, և իրենց համար կարևոր է ազգի պրոֆեսիոնալ պոտենցիալն օգտագործել. «ՔՊ չենք անելու, որ փակվենք փոքրիկ խմբակով ու բաժանենք իրար մեջ ինչ-որ բաներ։ Մեր հիմնական նպատակը պրոֆեսիոնալիզմի հիմքով ստեղծված պետական համակարգն է»։
Մեկ այլ հարցի, թե դիսկոմֆորտ չե՞ն զգում, երբ պարբերաբար հայտարարում են, որ մեր հաջորդ վարչապետը Սամվել Կարապետյանն է լինելու, Նարեկ Կարապետյանն այսպես արձագանքեց. «Մի ծանոթ ուժ կա, որի առաջնորդը հայտարարել էր, որ կամ ինքը կլինի ՀՀ վարչապետ, կամ ՀՀ-ն վարչապետ չի ունենա։ Չե՞ք կարծում, որ դա շատ ագրեսիվ վերաբերմունք է մեր ժողովրդավարությանը կամ մեր պետականության հանդեպ անարգանք է։ Իհարկե, այդպես է, վստահ եմ՝ դուք էլ եք այդպես կարծում, որ մեր երկիրը միշտ պետք է ունենա վարչապետ, բայց այդ վարչապետը երրորդ անգամ նույն մարդը չպետք է լինի, որովհետև ժամանակին այդ նույն մարդը երրորդ ժամկետի համար գլխավորեց ժողովրդի դժգոհությունը։ Ժողովուրդը դժգոհ էր ու այսօր էլ է դժգոհ»։
Արփինե ՍԻՄՈՆՅԱՆ
