«Ինձ թվում է, որ ժամանակին մենք արձագանքել ենք տարբեր մակարդակներով՝ լինի եպիսկոպոսների, լինի միաբանության, լինի Գերագույն հոգևոր խորհրդի կողմից»,- այսօր, խմբագիրների հետ հանդիպման ժամանակ ասաց Ամենայն Հայոց Կաթողիկոս Գարեգին Երկրորդը՝ պատասխանելով հարցին՝ ինչո՞ւ էր Եկեղեցին կրավորական կեցվածք ընդունել, երբ քաղաքական իշխանությունը տարբեր ձևերով հարձակվում էր Եկեղեցու և ՀԱԵ սպասավորների վրա։ Լրագրողը հետաքրքրվեց՝ եթե առաջիկայում էլ ՔՊ-ն վերընտրվի և փորձի կյանքի կոչել ՀԱԵ-ի դեմ իր նախընտրական ծրագիրը, նո՞ւյն կեցվածքին ականատես կլինենք։
«Որևիցե ձևով մենք մտավախություն չունենք մեր եկեղեցու և մեր ժողովրդի իրավունքները պաշտպանել. դա մեր կոչումն է, մեր առաքելությունը, մեր հովվական գործունեությանը զուգընթաց, և որևէ գործողություն չի կարող կաշկանդել մեզ մեր պարտականություններն իրականացնելու»,- պատասխանեց Վեհափառը։
Ինչ վերաբերում է Նիկոլ Փաշինյանի հակաեկեղեցական արշավին միացած 10 Եպիսկոպոսներին, Վեհափառն ասաց. «Որոշ եպիսկոպոսներ միացան վարչապետի բարենորոգչական ծրագրին։ Այդ գործընթացներից հետո հարաբերություն չի եղել եպիսկոպոսների հետ և նաև այն եկեղեցականների հետ, որոնք նույնպես միացել են այդ շարժմանը։ Մենք, անշուշտ, տարբեր առիթներով, մեր խոսքերում, մեր հրապարակումներում, մեր ուղերձներում հնչեցրել ենք հրավեր՝ կանոնական դաշտ վերադառնալու։ Կհուսանք, որ ականջալուր կլինեն, կանդրադառնան և կվերադառնան Մայր եկեղեցու գիրկը։ Բնականաբար, իրենց այս գործողությունը քննության առարկա պիտի լինի, պիտի առիթ տրվի, որպեսզի իրենք ներկայացնեն բացատրություն իրենց գործողության առնչությամբ, որից հետո համապատասխան որոշում կկայացվի»։
Մանրամասները՝ տեսանյութում
Կարդացեք նաև
Ամբողջական տեսանյութը՝ այստեղ
Նելլի ԳՐԻԳՈՐՅԱՆ
