«Թողեք մի քիչ հանգստանամ։ Կլինի՞ մի քիչ հանգստանամ, ութ տարի առաջնագծում «ավտոմատը» ձեռքս կանգնած եմ եղել»,- խորհրդարանում լրագրողների հետ զրույցում ասաց ԱԺ նախագահ Ալեն Սիմոնյանը։
Հարցերը հետևյալն էին՝ նեղացածության արդյո՞ւնք է, որ մանդատը չի վերցնում, և ինքն իր համար ստացե՞լ է հարցի պատասխանը՝ ինչու թիմը նման որոշում կայացրեց։ Ալեն Սիմոնյանը պատասխանեց, որ նման խոսակցություն չի ունեցել և համարում է, որ նման խոսակցությունը տեղին չէ։
«Ես «Քաղաքացիական պայմանագրի» ստեղծողներից եմ, քաղաքական գործընթացի մաս եմ, այդ գործընթացում կմնամ այնքան ժամանակ, որքան ՔՊ-ին պետք կլինեմ։ Կլինի առաջարկ՝ կքննարկեմ»,- ասաց Ալեն Սիմոնյանը։
Նա «անհեթեթություն» որակեց խոսակցությունները՝ ՀՀ նախագահի պաշտոնին հավակնությունների մասին։ Ասաց՝ որևէ մեկի հետ չի եղել նման խոսակցություն, կոռեկտ էլ չի համարում նման խոսակցությունները։ Հավելեց՝ ՀՀ-ն ունի նախագահ, և ինքն այդ նախագահին շատ է սիրում և գնահատում։
Կարդացեք նաև
Ակտիվ քաղաքականության մեջ լինել-չլինելու մասին հարցին էլ պատասխանեց. «Բայց ինչի՞ չպիտի չլինել ակտիվ քաղաքականության մեջ, իմ նման քաղաքական գործիչները շա՞տ են, որ ես դաշտը թողնեմ «եռագլուխներին»։ Ես մասնակցել եմ քարոզարշավին և խոստումներ եմ տվել ընտրողներին։ Իմ խրամատը հինգ տարի այս պաշտոնում եմ պահել, կշարունակեմ այլ տեղ պահել։ Ես միշտ լինելու եմ Նիկոլ Փաշինյանի կողքին՝ կես քայլ հետ։ Որ պահին ես իրեն պետք գամ, ինքը կշրջվի եւ կտեսնի»։
Մանրամասները՝ տեսանյութում
Ամբողջական տեսանյութը՝ այստեղ
Նելլի ԳՐԻԳՈՐՅԱՆ
Լուսանկարը՝ արխիվային
