Երևան քաղաքի առաջին ատյանի ընդհանուր իրավասության քրեական դատարանի Ավանի նստավայրում քիչ առաջ ավարտվեց Գագիկ Ծառուկյանի գործով շուրջ 6 ժամ տևած դատական նիստը, որի ընթացքում դատարանը քննարկում էր Գագիկ Ծառուկյանի կալանքը երկարացնելու միջնորդությունը։
Գագիկ Ծառուկյանի պաշտպան Էմին Խաչատրյանը տեղեկացրեց, որ դատարանը որոշումը կհրապարակի վաղը․ «Ժամի հետ կապված դեռ որոշում չկա, դատարանի աշխատակազմը մեզ նախօրոք տեղեկացնի որոշման հրապարակման ժամի վերաբերյալ»։
Նիստի ընթացքի մասին էլ ասաց․ «Եթե մենք խոսեինք բացառապես իրավական գործընթացների մասին, կասկածից վեր է, որ Գագիկ Ծառուկյանը պետք է ազատ արձակվի։ Բայց, հաշվի առնելով վերջին ժամանակներում տեղի ունեցող իրադարձությունները, ինչին այս գործի քննության ընթացքում ականատես ենք եղել, միայն պետք է հույս ունենանք, որ դատավորը վեր կգտնվի այս ամենից և պատշաճ քննության կարժանացնի մեր կողմից ներկայացվող ծանրակշիռ ապացույցները, որոնք վկայում են, որ, բացի նրանից, որ տուժողները պետք է լինեին մեղադրյալներ, իսկ պարոն Ծառուկյանը՝ տուժող, ավելին՝ տվել են սուտ ցուցմունքներ»։
Կարդացեք նաև
Պաշտպանը հայտնեց, որ Գագիկ Ծառուկյանի առողջական վիճակը բավարար է, իսկ տրամադրվածությունը՝ մարտական․ «Պարոն Ծառուկյանն իր դիրքորոշմամբ ևս մեկ անգամ վերահաստատեց, որ այս ամենը ժամանակավոր բնույթ է կրում, ինքը մեղադրյալ չի կարող լինել, իսկ իր բարի համբավն արատավորող Իրանի քաղաքացիները ժամանակի ընթացքում պարտադիր ենթարկվելու են քրեական պատասխանատվության՝ սուտ ցուցմունքի և սուտ մատնության համար»։
Գագիկ Ծառուկյանի կալանքը երկարացնելու վերաբերյալ միջնորդության քննությունն ամբողջությամբ՝ տեսանյութում
Տաթև ՀԱՐՈՒԹՅՈՒՆՅԱՆ
