Aravot.am-ի տեղեկություններով, Շիրակի մարզային քննչական վարչության Արթիկի և Անիի բաժնում նախաձեռնվել է քրեական վարույթ՝ Արթիկ քրեակատարողական հիմնարկի մի քանի աշխատակիցների կողմից պաշտոնական լիազորություններն անցնելու կամ չարաշահելու կասկածանքով։
Քրեական վարույթը նախաձեռնվել է Արթիկ քրեակատարողականի 39-ամյա կալանավոր Ա․Ս․-ի բողոքի հիման վրա։
Վերջինս, որը կասկածվում է Քրեական օրենսգրքի մի քանի հոդվածներով, մասնավորապես գողություն կատարելու և վստահված գույքը հափշտակելու մեջ, հաղորդում է ներկայացրել քրեակատարողականի անվտանգության ապահովման բաժնի աշխատակից Հ․Թ․-ի, հերթափոխի խմբի գլխավոր մասնագետ Հ․Կ․-ի և հերթափոխի պատասխանատու Վ․Բ․-ի դեմ առ այն, որ նրանք սեպտեմբերի 3-ին իրեն բռնության են ենթարկել։
Շիրակի մարզային քննչական վարչությունում էլ հարուցվել է քրեական վարույթ՝ Քրեական օրենսգրքի 441 հոդվածի 2-րդ մասի 1-ին և 4-րդ կետերի հատկանիշներով է, այն է՝ «Պաշտոնատար անձի կողմից իշխանական կամ ծառայողական լիազորությունները կամ դրանցով պայմանավորված ազդեցությունը չարաշահելը կամ լիազորություններն անցնելը»։
Կարդացեք նաև
Այն նախատեսում է պատիժ՝ 4-8 տարվա ազատազրկմամբ, իհարկե, եթե նախաքննությամբ պարզվի, որ պաշտոնատար անձի կողմից արարքը (իշխանական կամ ծառայողական լիազորությունները կամ դրանցով պայմանավորված ազդեցությունն ի վնաս պետական կամ ծառայողական շահերի օգտագործելը կամ իր ծառայողական պարտականությունը չկատարելը կամ ոչ պատշաճ կատարելը կամ այնպիսի արարք կատարելը, որը չի բխում իր լիազորություններից կամ դուրս է իր լիազորությունների շրջանակից, որն էական վնաս է պատճառել անձի կամ կազմակերպության իրավունքներին, ազատություններին կամ օրինական շահերին կամ հասարակության կամ պետության օրինական շահերին) կատարվել է բռնություն գործադրելով կամ բռնություն գործադրելու սպառնալիքով, ինչպես նաև՝ մի խումբ պաշտոնատար անձանց կողմից նախնական համաձայնությամբ։
