Համաշխարհային տնտեսական ճգնաժամի պատճառով՝ աշխատելու նպատակով արտերկիր մեկնողների թիվը պակասել է: Երեկ այս մասին հայտնել է տարածքային կառավարման նախարարության Միգրացիոն գործակալության միգրացիոն ծրագրերի բաժնի պետ Իրինա Դավթյանը: Նրա ներկայացմամբ, վերջին 3 ամիսներին 30%-ով նվազել են նաեւ տրանսվերտները:
«ՄԱԿ-ի հայկական ասոցիացիա» հասարակական կազմակերպության ծրագրերի ղեկավար Գայանե Արսենյանն էլ նշեց, որ «Հայաստանում միգրացիոն հոսքերի կառավարման հզորացում» նախագծի հիմնական նպատակն է աջակցել հանրապետություն վերադարձած մարդկանց ու կանխել քաղաքացիների անօրինական միգրացիայի հոսքը: Տիկին Արսենյանը նաեւ հայտնեց, որ սույն ծրագրով իրենք համապարփակ փաթեթ են ներկայացնելու վերադարձողներին՝ աշխատանք գտնելու խնդրի վերաբերյալ. «Իրենց կառաջարկվեն վերապատրաստման, որակավորման դասընթացներ անցնել: Նաեւ նախատեսվում է փոքր բիզնես ներդնել, ցանկացողներին փոքր դրամաշնորհներ առաջարկել, որոնք կօգնեն սեփական բիզնես հիմնել»:
