Կենտրոնական ընտրական հանձնաժողովը նախընտրական քարոզարշավի կարգի մի շարք խախտումներ է արձանագրել: Հանձնաժողովի նախագահ Տիգրան Մուկուչյանը խախտումներից առանձնացրեց հասարակական տրանսպորտների վրա կուսակցությունների նախընտրական պաստառները. «Նշված հարցի վերաբերյալ անմիջապես տեղեկացվել է, որ դա օրենքի պահանջի խախտում է եւ մեզ հավաստիացրել են, որ նշված խախտումները վերացվել են»:
Նա նշեց, որ առանձին դեպքերում էլ պատգամավորի թեկնածուների պաստառներն են փակցվել ոչ այնտեղ, որտեղ պետք է փակցվեին: «ԿԸՀ –ի կողմից բարձրացված հարցերը օպերատիվ լուծում են գտել»,- վստահեցրեց պարոն Մուկուչյանը:
Նա ասաց, որ իրավախախտներն էլ վարչական պատասխանատվության են ենթարկվելու:
Պարոն Մուկուչյանը չարձագանքեց այն դիտարկմանը, թե այսօր էլ քաղաքում կուսակցությունների պաստառներով հասարակակական տրանսպորտ է երթեւեկել:
Արփինե ՍԻՄՈՆՅԱՆ
