ՀՀ փաստաբանների պալատի անդամ, փաստաբան Կարեն Թումանյանին Ոստիկանության Լոռու մարզի քննչական բաժնից գրություն է եկել, որով նրան հրավիրում են քննչական բաժին` ապրիլի 16-ին վանաձորցի ցուցարարների կողմից ՀՔԱ Վանաձորի գրասենյակի վրա կատարած հարձակման գործի շրջանակներում բացատրություն տալու:
Ապրիլի 16-ին ադրբեջանական ֆիլմերի ցուցադրությանը դեմ վանաձորցիները հարձակվել էին ՀՔԱ Վանաձորի գրասենյակի վրա: Արդյունքում գրասենյակի գույքը վնասվել է, աշխատակիցներից մեկի առողջությանն էլ վնաս է պատճառվել:
Վերոնշյալ հանգամանքների կապակցությամբ ՀՀ քրեական օրենսգրքի 180-րդ հոդվածի կարգով Լոռու մարզի քննչական բաժնում նյութեր են նախապատրաստվում` քրեական գործ հարուցելու հիմքերի բավարար լինելը եւ առիթի օրինականությունը ստուգելու նպատակով:
Գործի շրջանակներում գրասենյակի շահերը, վճարովի ծառայությունների մատուցման պայմանագրի համաձայն, իրականացնում է փաստաբան Կարեն Թումանյանը:
Կարդացեք նաև
Նա նշում է, որ իրենից բացատրություն վերցնելը անօրինական է, չի բխում օրենսդրի պայմաններից, քանի որ մի կողմից իրավապահ մարմինները չունեն լիազորություն փաստաբանից բացատրություն վերցնելու, մյուս կողմից էլ օրենսդիրը պարտավորեցնում է փաստաբանական գաղտնիք չհրապարակել:
«Ես` որպես փաստաբան, քննչական բաժնի կողմից նախապատրաստվող նյութերի շրջանակում կազմակերպության ներկայացուցիչն եմ: Ինձ չեն հետաքրքրում դեպքին նախորդող գործողությունները, դրանց շարժառիթները: Այս դեպքում ինձ հետաքրքրում են գրասենյակի վրա կատարված հարձակման ոչ իրավաչափ լինելն ու ոստիկանների գործողությունները»:
Բացի այդ` ոստիկանության Լոռու մարզի քննչական բաժնից նրան խնդրել են իրենց տրամադրել 2012 թ. ապրլիլի 16-ին ՀՔԱ Վանաձորի գրասենյակում ցուցադրվելիք ադրբեջանական ֆիլմերը, ինչպես նաեւ դրանց ցուցադրման համար հիմք հանդիսացած փաստաթղթերի պատճեները:
Կարեն Թումանյանը անհեթեթ է համարում իրենից ադրբեջանական ֆիլմերի պահանջը:
Փաստաբանը նշում է, որ ինքը ընդհանրապես շահագրգռվածություն չունի ադրբեջանական կամ թուրքական ֆիլմերի, ապրանքների նկատմամբ:
«Ոչ «Պոպուլեքս» փաստաբանական գրասենյակը, ոչ մենք` փաստաբաններ Կարեն Թումանյանս ու Էդմոն Մարուքյանը, կապ չունենք ադրբեջանական որեւէ երեւույթի հետ, դեմ ենք այդ փառատոնին ու ադրբեջանական ֆիլմերի ցուցադրությանը: Էդմոն Մարուքյանն էլ այժմ արձակուրդում է, փաստաբանական գործունեություն չի իրականացնում եւ զբաղվում է նախընտրական քարոզչությամբ»:
«Ես կտրականապես հրաժարվում եմ բաժին ներկայանալուց, ավելին, այս քայլը իմ անձի դեմ որակում եմ որպես վիրավորանք»,-եզրափակում է Կարեն Թումանյանը:
Անուշ Բուլղադարյան
Վանաձոր
