Մոտ 1,5 ամիս հետաձգելուց հետո այսօր Շիրակի մարզի ընդհանուր իրավասության դատարանում դարձյալ վերսկսվեց Թուրքիայի Տրապիզոն քաղաքում մարմնավաճառությամբ ու կավատությամբ զբաղված Նարինեի ու Սուսաննայի դեմ հարուցված քրեական գործի քննությունը: Այս տիկնայք մեղադրվում են 31-ամյա գյումրեցի մատուցողուհի Հրանուշին Թուրքիայի այդ քաղաքում թրաֆիքինգի զոհ դարձնելու մեջ: Եվ եթե գյումրեցի մարմնավաճառուհի Նարինեին մեղադրում են Հրանուշին իր հետ Թուրքիա հասցնելու ու գործի մեջ ներքաշելու մեջ, ապա երևանցի 60-ամյա Սուսաննան մեղադրվում է այսպես ասած զոհին թանկ գներով ու նիսյայով շորեր վաճառելու, նրան իրենից կախվածության մեջ դնելու , հետևաբար և մարմնավաճռության մղելու մեջ:Հիշեցնենք, որ այս տիկինը բնակվել է Տրապիզոն քաղաքում և հայտնի է Դոկտոր մականունով , քանի որ մասնագիտությամբ լինելով բուժքույր, իր ծառայութուններ է մատուցել, դեղեր ներարկել ու սեռավարակումից փրկել մարմնավաճառուհիներին:
Դատական այս նիստը տևական ժամանակ հետաձգվում էր Դոկտորի փաստաբանի պատճառով, վերջինս միջնորդություն էր ներկայացրել ` խնդրելով ժամանակ տալ այդ տիկնոջ հիվանդության մասին փաստաթղթերը Թուրքայից բերել տալու նպատակով, այնուհետ հիվանդացել էր հենց փաստաբանը:
Այսօր Դոկտորն ասաց, որ ինքը հոգնել է փաստաբանից`Մելանյա Սարգսյանից ու «թազա» փաստաբան է վարձել: Կարապետ Աղաջանյան անուն-ազգանունով մեկն էլ եկավ ու ներկայացավ որպես փաստաբան, ով չէր հասցրել պայմանագիր կնքել ամբաստանյալի հետ:Այս միջնորդությունը հունից հանեց դատավոր Էդուարդ Մանուկյանին, ով հարցրեց. «Տիկին, այս գործին ո՞վ պիտի լուծում տա, ո՞վ է դատավորը, եթե ես եմ դատավորը, ո՞նց եք առանց ինձ բանակցություններ վարում» :Տիկինն արդարացավ, թե փաստաբանը խաղեր է տալիս, մինչդեռ դատավորն ասաց, որ փաստաբանի բողոքելով էլ, խաղեր տվողը հենց իր հարազատներն են: Դատավորը կտրականապես դեմ կանգնեց ժամանակ տալ նոր փաստաբանին գործի նյութերին նոր-նոր ծանոթանալու, քանի որ դատը արդեն մոտնում է ավարտին: «Հերիք է էլի , 6 ամիս է` ինչ դատավարությունը սկսվել է, 11 նիստից 7-ը հետաձգվել է, վարչության պետն ասում է` 8 տոննա բենզին եմ ծախսել ամբաստանյալների վրա, վերջը չի կարելի էդքան վնաս հասցնել, Աբովյան քերակատարողականից ձեզ տանել-բերելը էդքան հե՞շտ է»,- ասաց դատավորը` նիստը նշանակելով վաղը:
Նունե ԱՐԵՎՇԱՏՅԱՆ
Կարդացեք նաև
